Superiorja dhe Kategoria e Parë kanë hyrë në një fazë mjaft interesante. Në elitën e futbollit shqiptar mbyllet faza e tretë këtë fundjavë dhe në program për sot janë katër duele, ku spikat Lacci-Vllaznia, ndeshje që luhet prej orës 16:00 në stadiumin e kurbinasve.
Në të njëjtën orë luan edhe Teuta e vendit të parë, që në letër ka një ndeshje të lehtë ndaj Apolonisë së vendit të fundit. Trajneri Edi Martini dhe futbollistët e tij e dinë mirë se nuk ka asnjë fitore të sigurtë në këtë kampionat dhe motivimi ndaj fierakëve duket të jetë në nivelin maksimal.
Më parë do të zhvillohen edhe dy ndeshje të tjera, prej orës 13:00. Tirana ka mundësinë të ushtrojë presion te skuadrat e kreut dhe objektivi Europë është minimumi për kampionët në fuqi, që një sy e kanë edhe te titulli nëse rivalët gabojnë dhe vetë vijojnë me fitoret.
Bardheblutë luajnë në transfertë kundër Skënderbeut, skuadër që i ka fituar dy ndeshjet e fundit dhe shpreson ende të mbijetojë në Superiore. Takimi tjetër është ai mes Kastriotit dhe Kukësit, një finale për të dyja ekipet, që nuk duan të rrezikojnë zonën “play-out” për të luajtur ndeshje shtesë për qëndrimin në Superiore.
Kategoria e Parë sjell gjithashtu ndeshje mjaft interesante dhe sytë do të jenë në Peshkopi, aty ku Korabi dhe Dinamo do të përballen mes tyre në një duel që të dyja skuadrat do tentojnë të fitojnë. Blutë e kryeqytetit e kanë shumë të rëndësishme sidomos që të mos humbasin.
Burreli i vendit të parë normalisht do tentojë të përfitojë nga përplasja e rivalëve, por kurrsesi nuk mund ta nënvlerësojë duelin që ka në transfertë me Vorën. Në grupin A, në zonën “play-out”, Oriku dhe Partizani B e kanë betejë në distancë.
Skuadra vlonjate luan në shtëpi kundër Besëlidhjes, që e nisi me fitore fazën e tretë. Të kuqtë nga ana tjetër luajnë në transfertë ndaj Veleçikut të vendit të fundit. Në grupin B Elbasani i vendit të fundit përballet me Lushnjën dhe këta të fundit me siguri nuk do e diskutojnë fitoren. / abcnews.al
