Zinedine Zidane priste një reagimin nga ekipi i tij dhe ashtu ndodhi. Real Madrid mposhti 1-3 Barcelonën në “Camp Nou” dhe u rikthye te suksesi pas dy humbjeve shtëpiake me Cadiz në kampionat e Shakhtar Donetsk në Champions League.
Trajneri francez foli për mediat pas përfundimit të takimit, analizoi ndeshjen dhe vlerësoi djemtë e tij për lojën që zhvilluan. “Jam shumë i lumtur për djemtë, arritëm një fitore të gjithë si skuadër. Nuk zhvilluam ndeshjen perfekte, por asnjëherë nuk është e thjeshtë të fitosh në fushën e Barcelonës.
E kishim përgatitur shumë mirë këtë takim, u mbrojtëm mirë, u shfaqëm solidë pas. Ata lanë hapësira dhe ia dolëm t’i shfrytëzonim. Nuk është se Reali im ka harruar të luajë futboll, por hasim vështirësi ndaj skuadrave që na mbyllen në mbrojtje.
Gjithsesi, ishin vetëm tre pikë, asgjë më shumë. Le të festojmë këtë rezultat, të pushojmë për të karikuar energjitë dhe më pas do të mendojmë për sfidën e mesjavës në Champions League“, deklaroi trajneri i Real Madrid. /abcnews.al
