Zhurmë e madhe te Milani dhe e gjitha kjo krijohet prej situatës jo të mirë financiare. Bilanci negativ bën që të mendohen edhe transferimet dhe një prej lojtarëve që rrezikon është spanjolli Suso. Klubi doli pak ditë më parë dhe e përjashtoi mundësinë e shitjes së tij dhe portierit Donnaruma.
Gjithsesi në mediat italiane janë të bindur se Suso është një nga ata lojtarë që kuqezinjtë mund ta vendosin në treg. Jo vetëm kaq, por sipas “Tuttosport” ka edhe një ultimatum për të. “Zgjohu, ose ik në janar”, ky është titulli i të përditshmes sportive italiane, që në fakt duhet thënë se është nëj gazetë më pranë Juventusit.
Në artikull thuhet se Suso do të ketë mbështetjen e trajnerit Stefiano Pioli, i cili që në prezantim ka folur mirë për sulmuesin anësor. Gjithsesi gjatë javëve të para të kampionatit ai është vërshëllyer nga tifozët prej formës që kalon, ndaj duhet të rikthehet i mëparshmi. Për të ka interesim nga klube të ndryshme dhe nëse te Milani shohin që do të vijojë të jetë në lartësinë e duhur, atëherë në janar shitja e tij është një opsion. /abcnews.al
