Loading ...
Presidenti ukrainas Volodymyr Zelensky, bëri thirrje për masa më të ashpra kundër kompanive në Evropë që, sipas tij, kontrollohen nga Rusia dhe vazhdojnë të mbështesin industrinë ushtarake ruse.
Deklaratat u bënë gjatë ceremonisë së hapjes së presidencës së Këshillit të Bashkimit Evropian nga Irlanda në Dublin.
Presidenti Zelensky falënderoi Irlandën për mbështetjen ndaj Ukrainës që nga fillimi i pushtimit rus dhe theksoi se gjatë presidencës irlandeze mund të arrihet përparim konkret në marrëveshjen për dronët që Ukraina i ka propozuar Bashkimit Evropian.
Presidenti ukrainas kërkoi gjithashtu një paketë të re sanksionesh evropiane kundër “flotës së fshehtë” detare të Rusisë dhe mekanizmave që, sipas tij, i lejojnë presidentit Vladimir Putin të vazhdojë luftën.
Ai tha se në disa vende evropiane ekzistojnë kompani në pronësi ose nën kontroll efektiv të Rusisë dhe oligarkëve të sanksionuar, të cilat vazhdojnë t’i furnizojnë agresorit materiale të rëndësishme.
Nga ana e tij, kryeministri irlandez Micheal Martin hodhi poshtë pretendimet se eksportet e aluminit nga rafineria “Aughinish Alumina” kanë dëmtuar mbështetjen e Irlandës për Ukrainën.
Ai theksoi se Irlanda ka mbështetur të gjitha paketat e sanksioneve të miratuara nga BE-ja dhe nuk dëshiron, në asnjë mënyrë, të ndihmojë makinerinë ushtarake ruse.
Gjatë fjalimit, Zelensky iu drejtua edhe presidentit të Këshillit Evropian Antonio Costa, duke kërkuar përshpejtimin e procesit të anëtarësimit të Ukrainës në BE.
Me humor ai tha se mund të hapeshin edhe pesë kapituj të tjerë negociues, ndërsa Costa iu përgjigj me një “ndoshta” nga audienca.
