BE është në pritje të aplikimit të Ukrainës për t’u bashkuar me Bashkimin Europian. Madje menjëherë pas thirrjes së presidenti ukrainas, Volodymyr Zelenskiy përfaqësuesi i BE-së për çështjet e jashtme dhe politikën e sigurisë Josep Borrell ka thirrur sot një takim urgjent me ministrat e Mbrojtjes për të diskutuar për luftën në Ukrainë.
Axhenda e këtij takimi përqendrohet në “nevojat urgjente” dhe bashkërendimin e ndihmës së bllokut për ukrainasit, sipas një postimi të Borrell.
Gjatë ditës së sotme, presidenti ukrainas, i bëri thirrje Bashkimit Europian për anëtarësim urgjent në bllokun 27-anëtarësh të vendit sipas procedurave speciale.
Që Ukraina të bëhet një vend anëtar i BE-së, vendi kandidat duhet të përshtasë institucionet, standardet dhe infrastrukturën e tij për të qenë një shtet anëtar. Procesi i anëtarësimit përfshin përputhshmërinë me kriteret e anëtarësimit duke përfshirë miratimin dhe zbatimin e acquis.
Shqipëria, Republika e Maqedonisë së Veriut, Mali i Zi, Serbia dhe Turqia janë aktualisht vende kandidate.
/abcnews.al
