Atentati me tre viktima në Shkodër tronditi një ditë më parë lagjen “Dobraç”. Lidhur me këtë ngjarje po hetohet pista se si autorët kanë vepruar. Nisur nga dinamika e ngjarjes sipas autoriteteve, atentatorët kanë marrë të gjitha informacionet për lëvizjet e Hamza Licit dhe Bushatit. Gjithashtu mësohet se janë sekuestruar kamera të bizneseve dhe të zonës.
“Deri tani nga e shtëna e parë deri kur automjeti është ndaluar janë gjetur rreth 28 gëzhoja. Ndërsa në afërsi të automjetit janë gjetur edhe 14 gëzhoja të tjera. Duket se ka qenë një atentat i planifikuar mjaft mirë për të mos dështuar., Është ndjekur automjeti, është qëlluar në lëvizje. Dhe automjeti që drejtohej nga Hamza Lici ka ecur paralel me automjetin e tyre dhe ka filluar të qëllojë deri kur është përplasur në një servis dhe me një motoçikletë. Dyshohet se është qëlluar nga dy kallashnikov. Ngjarja edhe më e rëndë kur çifti Basha u përplasën nga automjeti i shënjestrës së atentatit, dhe për pasojë humbi jetën Flutura Basha”, raportoi gazetari Simon Shkreli për ABC News.
Kujtojmë se dy javë më parë 32-vjeçarit Arlind Bushati është tentuar t’i bëhej atentat në zonën e Pedonales. Ndërsa Hamza Lici është një personazh me hasmëri dhe me probleme në zonë. Grupi hetimor ende është i paqartë për të parë se cili ka qenë shënjestra.
/abcnews.al/
