Një ditë pas atentatit ku mbeti i vrarë Fatos Ferracaku dhe u plagos miku i tij në Shkodër kanë mbërritur zyrtarë të lartë të Policisë së Shtetit. Mësohet se në drejtorinë e Policisë ndodhet Drejtori për Rendin dhe Sigurinë publike Gjovalin Loka dhe një Prokuror i Krimeve të Rënda.
Deri tani ende nuk ka një të dyshuar për ngjarjen, megjithëse janë shoqëruar disa persona në komisariat. Pasi janë marrë në pyetje ata janë lënë të lirë. Fatos Ferracaku kushëri me viktimën e 1 shtatorit Arjan Ferracaku u qëllua me armë zjarri në lagjen “Rus” të Shkodrës dhe ndërroi jetë në spital. Shoku me të cilin ndodhej në lokal, Fatmir Mehaj një tregtar peshku, gjithashtu mori plumba, por nuk ka rrezik për jetën. Viktima 40 vjeç, tregtar peshku, ishte shenjestra e këtij atentati.
Dyshohet se pikërisht ky person ka qenë edhe shënjestra kur u vra kushëriri i tij Arjan Ferracaku. Nga burime të ABC News mësohet se autoret ishin dy persona me motor dhe të maskuar. /abcnews.al
