Vllaznia nuk shënonte e fitonte prej katër ndeshjesh, por Renato Malota dhe Gilman Lika i dhanë fund kësaj ecurie negative dhe shënuan golat e fitores në Gjirokastër përballë Luftëtarit vendas.
Miqtë e nisën mirë ndeshjen dhe dominuan minutat e para. Gligorov humbi një mundësi pas çerek ore lojë, ndërsa rasti i parë i Luftëtarit erdhi në minutën e 27-të. Hyseni doli përballë portierit Sherri, por gaboi. Bluzinjtë e morën veten dhe nisën të sulmonin, por pjesa e parë u mbyll pa gola.
Luftëtari nuk kishte alternativa përveç fitores dhe Marantas aktivizoi Filin në pjesën e dytë. Vendasit ishin më kërkues, teksa Alen Sherri ishte në një ditë të mirë. Pas një ore lojë u fut edhe Gilman Lika në lojë.
Minuta ndërrimesh dhe duelesh në mesfushë. Krymi dhe Malota provuan për kuqeblutë, ndërsa Fili pati mundësi të mirë dhjetë minuta përpara fundit, por goditi dobët. Minuta e 85-të ishte decizive. Krosim i Vllaznisë nga e djathta dhe Renato Malota kërceu bukur me kokë.
Topi në rrjetë dhe shkodranët në festë. Vllaznia nuk u ndal dhe shënoi sërish. Shtubina lëvizi bukur në krahun e majtë dhe dhuroi një asist për Likën, i cili nuk gaboi dhe vulosi fitoren e ekipit të tij. Ky sukses e ngjit Vllazninë përkohësisht në vend të katërt me 20 pikë, ndërsa Luftëtari mbetet i parafundit me vetëm 8 pikë. /abcnews.al
