Rihapet gara për titull në Superiore. Laçi i Shpëtim Duros fitoi 1-2 në Shkodër përballë Vllaznisë kryesuese, duke siguruar një trepikësh tepër të rëndësishëm në “Loro Boriçi”. Pjesa e parë dhuroi duele të forta dhe tension, ndërsa golat ishin ruajtur për në fraksionin e dytë.
Kyrian Nwabueze kaloi ekipin kurbinas në avantazh në minutën e 59-të. Gafë e mbrojtjes së Vllaznisë dhe finalizim i goleadorit kryesor të Laçit, i cili gjeti golin e shtatë sezonal në kampionat. Vendasit reaguan dhe rikthyen baraspeshën shtatë minuta më vonë.
Demir Imeri autori i golit për skuadrën e Brdaric, por bardhezinjtë e Duros goditën sërish në minutën e 72-të. Van Dave Harmon, i cili kishte vetëm dy minuta që ishte futur në fushë, ndëshkoi portierin Zogovic. Obanor u ndëshkua me karton të kuq pesë minuta më vonë dhe Laçi me dhjetë lojtarë.
Gjithsesi, miqtë ia dolën të ruanin avantazhin dhe siguruan tre pikë fantastike përballë skuadrës që po dominon futbollin shqiptar këtë sezon. Suksesi i sotëm e ka ngjitur Laçin në vend të dytë me 30 pikë, shtatë më pak se Vllaznia kryesuese. /abcnews.al
Vllaznia-Laçi 1-2
(Imeri 66′ / Nwabueze 59′, Van Dave 72′)
Vllaznia: Zogovic, Gurishta, Adili, Imami, Kruja (Vexhi 74′), Jonuzi (Avdijaj 83′), Marku (Kalezic 27′), Isaevski (Kalaja 83′), Imeri, Hoxhaj, Dilaver. Trajner: Thomas Brdaric
Laçi: Sherri, Malota, Ignjatovic, Obanor, Marku, Shehu (Ramos 90′), Deliu, Lushkja, Musta, Xhixha (Van Dave 70′), Nwabueze (Turkaj 79′). Trajner: Shpëtim Duro
GJYQTARË: Kreshnik Cjapi, Rejdi Avdo, Ilir Tartari, Denis Rexha.
Kartonë të verdhë: Imami 90+1′ / Shehu 20′, Marku 69′
Karton i kuq: Obanor 77′
77′ Laçi me dhjetë lojtarë. Erhun Obanor kryen një faull si lojtar i fundit dhe i kuq i menjëhershëm për mbrojtësin afrikan të bardhezinjve.
72′ Tjetër gol në Shkodër. Nwabueze nis bukur Van Dave. Sulmuesi afrikan i shkëputet mbrojtjes vendase dhe rikthen ekipin e Duros në avantazh.
66′ Vllaznia reagon shpejt dhe rikthen baraspeshën. Goditja e Krujës ndalet në shtyllë dhe Demir Imeri e dërgon topin në rrjetë.
59′ Zhbllokohet sfida. Gafë e mbrojtjes vendase dhe Laçi gjen golin e avantazhit me anë të Kyrian Nwabuezes, i cili nuk gabon përballë Zogovic.
50′ Skuadra kurbinase e nis në sulm pjesën e dytë. Redon Xhixha shfaqet dy herë i rrezikshëm, por goditjet e sulmuesit përfundojnë jashtë.
24′ Moment tensioni në fushë. Albion Marku nuk ndal një aksion dhe kjo sjell acarimin e lojtarëve të Vllaznisë. Situata qetësohet shpejt.
20′ Vjen kartoni i parë i verdhë. Julian Shehu kryen një ndërhyrje të ashpër dhe kryesori Cjapi i tregon të verdhin mesfushorit të ekipit mik.
19′ Gafë e portierit Sherri. Portieri i Laçit gabon në shkelmimin e topit, por Daliver nuk përfiton plotësisht. Shpëtojnë mirë bardhezinjtë.
17′ Goditja e parë në portë për Vllazninë. Haris Dilaver tenton një diagonale nga krahu i djathtë, por gjuajtje shumë e lehtë që pritet pa probleme nga Sherri.
