Loading ...
Gjysma e fëmijëve në botë janë të ekspozuar ndaj të paktën tre rreziqeve klimatike që mbivendosen, duke kërcënuar shëndetin, arsimin dhe mbijetesën e tyre. Ky është përfundimi i një raporti të fundit të UNICEF-it, i cili paralajmëron se kriza klimatike po prek gjithnjë e më rëndë jetën e të rinjve në mbarë globin.
Sipas raportit, më shumë se një miliard fëmijë përballen njëkohësisht me valë të të nxehtit, stuhi, përmbytje dhe thatësira, ndërsa fenomenet ekstreme të motit po bëhen më të shpeshta dhe më intensive.
UNICEF publikoi edhe pamje nga Papua Guinea e Re, ku fëmijët detyrohen të notojnë përmes një lumi të mbushur me krokodilë për të shkuar në shkollë, pasi një urë e rëndësishme u shkatërrua nga reshjet e dendura dhe nuk është rindërtuar. Mes tyre është edhe Lorna, 15 vjeçe, e cila çdo ditë rrezikon jetën për të ndjekur mësimet.
“Ëndrra ime është të bëhem mësuese ose pilote. Ne kemi nevojë për një urë të re që të mund të shkojmë në shkollë të sigurt çdo ditë”, është shprehur ajo.
Sipas UNICEF-it, komuniteti nuk ka mundur të sigurojë fondet e nevojshme për rindërtimin e urës, e cila u mor nga ujërat që në vitin 2012. Ndërkohë, ndryshimet klimatike po e bëjnë situatën edhe më të vështirë.
Raporti thekson se temperaturat në rritje dhe moti ekstrem po dëmtojnë infrastrukturën bazë, përfshirë rrugët dhe urat, duke krijuar pasoja serioze për komunitetet lokale dhe aksesin e fëmijëve në arsim.
Gjetjet tregojnë se pothuajse çdo fëmijë në botë është i ekspozuar ndaj të paktën një rreziku klimatik, ndërsa miliona të tjerë përjetojnë një kombinim të shumëfishtë kërcënimesh gjatë jetës së tyre.
Rajoni i Sahelit në Afrikë rezulton ndër më të prekurit, me mbi 4 milionë fëmijë që përballen njëkohësisht me valë të të nxehtit, temperatura ekstreme dhe stuhi rëre. Ndërkohë, vendet aziatike si Bangladeshi, Mianmari dhe Pakistani renditen ndër zonat ku fëmijët janë më të ekspozuar ndaj rreziqeve klimatike.
Edhe vendet me të ardhura të larta nuk mbeten të paprekura. Në Itali, më shumë se 6 milionë fëmijë janë të ekspozuar ndaj valëve të gjata të të nxehtit dhe thatësirave.
Drejtoresha ekzekutive e UNICEF-it, Catherine Russell, tha se jeta e fëmijëve po ndikohet gjithnjë e më shumë nga valët e të nxehtit, zjarret pyjore, thatësirat dhe përmbytjet.
“Gjysma e fëmijëve në botë jetojnë tashmë me të paktën tre kërcënime klimatike që mbivendosen dhe ndikojnë drejtpërdrejt në jetën e tyre të përditshme”, deklaroi ajo.
UNICEF u ka bërë thirrje qeverive dhe bizneseve të reduktojnë emetimet dhe të investojnë më shumë në masa përshtatëse ndaj ndryshimeve klimatike, me fokus të veçantë në mbrojtjen e fëmijëve dhe forcimin e sistemeve të arsimit, shëndetësisë dhe infrastrukturës.
