Loading ...
Ukraina ka përdorur për herë të parë raketën balistike të re “Pelican” (FP-7), gjatë një sulmi të gjerë gjatë natës në rajonin e Moskës. Lajmi u konfirmua nga presidenti ukrainas, Volodymyr Zelensky.
Presidenti ukrainas, Volodymyr Zelensky, deklaroi të dielën se forcat ukrainase goditën një “objekt të madh të industrisë ruse të naftës”, si dhe një strukturë logjistike në rajonin e Moskës.
Sipas Zelenskyt, gjatë operacionit Ukraina përdori gjithsej 10 lloje të ndryshme armësh, shumica e të cilave janë zhvilluar dhe prodhuar në vend. Mes tyre ishte edhe raketa balistike “Pelican” (FP-7), e cila u përdor për herë të parë në një operacion të tillë.
Operacioni, i zhvilluar nga forcat ukrainase të mbrojtjes dhe inteligjencës, kishte në shënjestër objekte të rëndësishme të industrisë së naftës dhe të zinxhirit logjistik rus.
Mes objektivave ishte edhe rafineria e naftës e Gazprom Neft në Moskë, në zonën e Kapotnyas.
Sipas autoriteteve ukrainase, kjo rafineri furnizon me rreth 40% të karburantit Moskën dhe zonat përreth saj.
Sulmi shkaktoi dëme edhe në një ndërtesë banimi, ndërsa autoritetet ruse raportuan viktima dhe të plagosur. Guvernatori rajonal deklaroi se të paktën dy persona u vranë dhe 20 të tjerë u plagosën.
Autoritetet ruse raportuan se të paktën dy persona humbën jetën dhe gjashtë të tjerë u plagosën pas një sulmi të përshkruar si “masiv” me dronë ukrainas në rajonin e Moskës.
Guvernatori Andrei Vorobyev tha se 249 dronë u rrëzuan gjatë natës, ndërsa shpërthime dhe zjarre goditën objekte banimi e një magazinë.
Në kryeqytet, një rafineri pësoi dëme dhe aeroportet Sheremetyevo e Vnukovo vendosën kufizime të fluturimeve.
Në Sofyino, një grua humbi jetën dhe pesë persona, mes tyre dy fëmijë, u plagosën kur një dron goditi një pallat. Në një tjetër distrikt, një burrë i moshuar vdiq kur shtëpia e tij u shkatërrua.
Kryebashkiaku i Moskës, Sergei Sobyanin, deklaroi se 450 dronë u interceptuan, duke e cilësuar sulmin si “të paprecedentë”.
