Loading ...
UEFA vazhdon “kundërsulmin” ndaj presidentit të FIFA, Gianni Infantino, ndërsa tani kërcënon me veprime ligjore lidhur me planin tashmë të braktisur për të shitur aksione te investitorë privatë për organizimin e garave. Udhëheqja e Infantinos ishte sfiduar tashmë publikisht nga konfederatat e Evropës dhe të Amerikës së Veriut, Qendrore dhe Karaibeve.
Por tani, siç raporton BBC, Uellsi u bë federate e parë që tërhoqi publikisht mbështetjen për kandidaturën e Infantinos për presidencën në zgjedhjet e marsit të ardhshëm.
Federata Angleze e Futbollit po përgatitet të bëjë të njëjtën gjë. Sipas “The Telegraph”, UEFA i dërgoi një letër Infantinos duke e paralajmëruar se po “shqyrton në mënyrë aktive ndërmarrjen e veprimeve ligjore lidhur me planin e propozuar nga FIFA dhe çështjet që lidhen me të”. UEFA shtoi se kërkon “masa të menjëhershme për të identifikuar, lokalizuar dhe ruajtur të gjitha dokumentet dhe informacionet e ruajtura në mënyrë elektronike, të përshkruara në këtë njoftim, të cilat janë në posedimin, kujdesin ose nën kontrollin e FIFA.
Këto detyrime lindin pavarësisht nga çdo politikë e brendshme për ruajtjen e të dhënave që mbahet nga ju ose organizata juaj dhe kanë përparësi ndaj çdo politike rutinë për shkatërrimin ose fshirjen e dokumenteve që përndryshe do të zbatohej,” thuhet në letrën, ku vihen re notat kërcënuese.
Kërkesa e UEFA-s për të gjitha dokumentet që lidhen me planin e investimit përfshinte “email-e, mesazhe të çastit në të gjitha aplikacionet, korrespondencë me shkrim dhe procesverbale të mbledhjeve”, si dhe ato që përfshijnë “çdo drejtues, punonjës, anëtar komiteti, konsulent ose agjent të FIFA-s, apo çdo shoqatë anëtare, konfederatë, transmetues, sponsor ose institucion financiar të FIFA-s”. Lidhur me afatin e 19 shtatorit për një vendim mbi planin, UEFA shtoi se dëshironte të ruante dokumentet “që lidhen me strukturën e pagesave për shoqatat anëtare të FIFA-s, përfshirë hartimin, modelimin, bazën ligjore, miratimin dhe komunikimet me shoqatat anëtare”.
