Fjoart Jonuzi është lojtari më i ri i Vllaznisë. Mesfushori kuksian është prezantuar te kuqeblutë pas firmosjes së kontratës për sezonin e ardhshëm.
24-vjeçari ishte pjesë e Gjilanit në IPKO Superligën e Kosovës sezonin e kaluar, ekip me të cilin u shpall nënkampion. Jonuzi është një prodhim i Kukësit, teksa u aktivizua për dy sezone edhe me Laçin.
“Fjoart Jonuzi ka nënshkruar për Vllazninë një kontratë një vjeçare me të drejtë nga ana e Klubit për rishikimin e saj në merkaton e Janarit nëse performanca e lojtarit nuk është në nivelin e dëshiruar nga stafi teknik.
Jonuzi është pëlqyer nga traineri Brdaric për të patur një forcë më tepër në mesfushë“, lexohet në komunikatën zyrtare të klubit shkodran. /abcnews.al
