Loading ...
Të paktën gjashtë nxënës kanë humbur jetën dhe 17 persona të tjerë janë plagosur pas të shtënave me armë në një shkollë të mesme në Filipine.
Ngjarja e rëndë ndodhi në Shkollën e Mesme Kombëtare Banga, në qytetin Banga të provincës Cotabato Jugore. Sipas raportimeve lokale, autori i dyshuar, i cili besohet se ishte nxënës i kësaj shkolle, është gjithashtu në mesin e viktimave.
Pas incidentit, autoritetet vendosën pezullimin e mësimit në të gjitha nivelet në qytetin Banga, ndërsa institucionet përgjegjëse nisën hetimet për zbardhjen e rrethanave të ngjarjes.
Departamenti i Arsimit i Filipineve tha se është “thellësisht i shqetësuar” nga incidenti dhe se po bashkëpunon me drejtuesit e shkollës, autoritetet lokale dhe forcat e rendit.
“Prioriteti ynë i menjëhershëm është siguria dhe mirëqenia e nxënësve, mësuesve dhe personelit të shkollës”, deklaroi departamenti.
Autoritetet kanë bërë të ditur gjithashtu se personave të prekur nga ngjarja do t’u ofrohet ndihmë e parë psikologjike, si dhe mbështetje për shëndetin mendor dhe mirëqenien psikosociale.
Publikut i është kërkuar të mos përhapë informacione të pakonfirmuara, ndërsa hetuesit po punojnë për të përcaktuar saktësisht se çfarë ka ndodhur dhe cili ka qenë motivi i mundshëm i sulmit.
Ngjarja vjen rreth një muaj pas një tjetër incidenti me armë në Universitetin “Ateneo de Zamboanga”, ku më 18 gusht mbetën të vrarë dy studentë, përfshirë edhe personin e armatosur.
Deri më tani, autoritetet nuk kanë bërë të ditur një motiv të mundshëm për të shtënat në shkollën e Bangës.
