Superiorja nuk ndalet dhe sot janë në program tre ndeshje të tjera, madje mjaft interesante. Tirana-Kukësi është ajo që tërheq më shumë vëmendjen, edhe sepse në këtë përballje mund të vendoset titulli kampion.
Verilindorët vetëm fitorja i mban me shpresa për titullin, por sërish asgjë nuk është në dorën e tyre. Tirana fatet e titullit i ka në duart e veta dhe zor të dështojë në hapat e fundit. Gjithsesi takimi i sotëm është interesant për t’u parë dhe nis prej orës 17:45.
Në të njëjtën orë luajnë edhe kampionët në fuqi. Partizani, pas fitores së Laçit një ditë më parë, duket të fitojë në Ballsh dhe të shpresojë për një vend në kupat e Europës. Në krahun tjetër edhe ballshiotët e kanë detyrim të marrin pikët e plota, pasi Vllaznia e vendit të tetë u është afruar.
Kjo javë e Superiores mbyllet në Durrës, aty ku Teuta dhe Skënderbeu luajnë prej orës 20:45. “Djemtë e Detit” duan të vijojnë ecurinë pozitive dhe të rimarrin vendin e tretë në klasifikim. Korçarët ndërkohë shkojnë në Durrës me mungesa, por do tentojnë të mos dalin pa pikë. /abcnews.al
