kukesi
Vladimir Prenga16:31 | 02/04/2020
Krisiti Vangjeli dhe Bruno Lulaj po ndajnë apartamentin këtë periudhe, ndërkohë që janë rivale në kampionat. Tirana është në vendin e parë dhe Kukësi i dyti. “Më mungojnë familjarët e mi. Djemtë më lodhin pak, se janë të lëvizshëm.
Gjithsesi kështu është më mirë, pasi nuk dimë kë mund të takojmë. Për momentin po qëndrojmë bashkë me Brunon në shtëpi. Urojmë që kjo situatë të kalojë sa më shpejt”, u shpreh Vangjeli fillimisht, ndërkohë që më pas u ngacmua për titullin.
“Çdo ekip do bëjë pjesën e vet. Çdo ekip ka pasur formën e vet. Ne mbase penalizohemi, pasi ishim në formë të mirë. Kemi diference me Kukësin. Me fitore në fillim mund të bëjmë që edhe kundërshtari të mos afrohet”, tha Vangjeli në lidhjen direkte në emisionin Fan Zone në Supersport.
Më pas e mori fjalën Lulaj: “Kemi shanset tona, matematika na e lejon. Janë edhe 10 javë kampionat dhe ato 9 pikë diferencë t’i përmbysim. Do japim gjithçka që ta fitoj unë kampionatin, jo Kristi”.
Mbrojtësi i Tiranës, dëshiron shumë që ta fitojë titullin dhe më pas ta festojë së bashku me tifozët bardheblu. “Titullin duam ta festojmë me tifozët e Tiranës. Kjo është kënaqësia më e madhe. Për atë arsye kam ardhur të Tirana”, përfundoi Vangjeli.
Vladimir Prenga12:55 | 31/03/2020
Formacioni me lojtarët më të mirë të ët gjithë kohërave, kjo është një nga sfidat e shumta të personazheve të botë sportive. Edhe trajneri i Laçit, Armando Cungu, i është bashkuar ftesës së bërë nga prej zyrtareve të klubit bardhezi.
Shkodrani njihet si një tifoz anglez, por në formacioneve e yjeve ka vend vetëm për Steven Gerard, legjendën e Liverpool. Buffon në portë, Cafu e Roberto Carlos nga krahët, kurse në qendër të prapavijës ka përzgjedhur dyshen e famshme të Milanit, Baresi-Maldini.
Në mesfushë pozicionohen Iniesta e Zidane, kurse Lionel Messi është zgjedhur nga Cungu si sulmues i dytë në mbështetje të Ronaldo fenomenit dhe legjendës Maradona. Tekniku më pas sfidon Roland Peqinin për të zgjedhur ekipin me lojtarët më të mirë.
“I emocionuar nga nominimi i Armando Cungu”, shkruan Peqini, i cili më pas ka renditur formacionin e Kukësit, që ia doli të kalonte tre ture në Europa League, pas sezonit të parë në Superiore. “Besoj këtë formacion e kujtojmë të gjithë me nostalgji”, shton Peqini. /abcnews.al
Veronik Istrefaj16:17 | 30/03/2020
Sulmuesi i Kukësit, Vasil Shkurtaj, vendosi të shkojë në Spanjë për të kryer terapi, por për fat të keq, Koronavirus u përhap kudo dhe fluturimet u anuluan. Shkurtaj ka mbetur i bllokuar në Spanjë dhe për Fan Zone në Supersport, tha:
“Nuk mund të kthehesha dot, prandaj mora vendimin të vij në Spanjë dhe të bëj këtu terapinë. Po bëj terapi normale, pastaj u bllokuan të gjitha. Preva biletë për tu kthyer, por u anuluan të gjitha fluturimet. Në këto momente, kam ngelur këtu.
Para tri ditësh, kisha dalë për vrap, kisha dalë vonë natën pas orës 11. Më ndaloi policia dhe më falën vetëm se isha i huaj, por nuk më falin më. Mund edhe të më burgosnin.
Rikuperimi? Po përpiqem të bëj më të mirë, duke bërë ushtrime në shtëpi në komunikim me doktorin. Unë duhet të bëj vrap, gjë që është e pamundur. Përpiqem që të bëj ushtrime në shtëpi. Kam folur edhe me presidentin e Kukësit, edhe me lojtarët kam folur thuajse çdo ditë.
Shëndeti është parimor, futbolli shpresoj të rikthehet sa më shpejt. Por shëndeti është kryesori. Diferenca me Tiranën? Ne kemi shumë besim, mund të rikuperojmë pikë. Patjetër që dua të dal edhe golashënues, është një ccmim individual që dua ta fitoj. Por më shumë dua kampionatin me ekipin”, tha Shkurtaj./abcnews.al
Igli Nikolli22:15 | 27/03/2020
Punimet në stadiumin e Kukësit vazhdojnë, por jo me të njëjtin ritëm. Koronavirusi ka bërë efektin e vet dhe intensiteti i punës ka rënë. Klubi verilindor ka publikuar foto të asja që po ndodh në stadiumin e ri.
“Punimet në stadiumin e ri të Kukësit vijojnë, megjithëse me ritme më të ngadalta. Po punohet me orare te shkurtuara dhe staf të reduktuar duke respektuar njëkohësisht edhe rregullat për sigurinë në kuadër të masave në luftën kundër COVID-19”, lexohet në postimin e bërë në faqen zyrtare.
Skuadra kuksian ka vuajtur shumë këtë sezon. Ajo është detyruar të “migrojë” në stadiume të ndryshme dhe e ka ndjerë shumë mbështetjen e tifozerisë së saj të zjarrtë. /abcnews.al
Veronik Istrefaj19:15 | 23/03/2020
Sulmuesi i Kukësit, Kristal Abazaj, ka dhënë një intervistë me lidhje telefonike me emisionin Fan Zone në Supersport, aty ku preku disa tema interesante rreth tij, klubit të Kukësit dhe të ardhmes.
KARANTINA – “Jam mësuar me këtë situatë, sepse në Belgjikë qëndroja vetëm. Dilja vetëm me disa miq të mi. Kohën e lirë, përgjithësisht, e kaloj me Albin, e kam shokun më të mirë, dhe më shokët e mi, ata të rrethit tim”.
NDËRPRERJA – “Besoj se po, sepse po kalonim një moment të keq, edhe pse po luanim mirë. Po ndëshkoheshim në minutat e fundit, na kishte ndodhur në katër ndeshjet e fundit me Tiranën, ndeshjen në Ballsh, në Durrës. Tirana e ka krijuar me meritë këtë distancë që ka.
RASTI KUNDËR TEUTËS – “Për ne sulmuesit, kur humbim rastet, është e rëndë. Në stërvitje unë gjithmonë i shënoj ato raste, por nuk e di pse zgjodha të godisja në atë mënyrë”.
FRIGORIFERI – “Të them të drejtën, po, miku im më i mirë. Kur isha në Belgjikë, konsumoja shumë çokollata, na e ka lënë këtë ves”.
GJICI – “Nuk kam komunikime me presidentin, ai ka qenë i angazhuar me punët si kryetar bashkie”.
TITULLI – “Nuk e di, kemi shumë ndeshje të vështira, me Partizanin me Tiranën… Unë besoj, por sigurisht që është e vështirë”.
E ARDHMJA – “Po pres merkaton e verës, do të lëviz nga këtu. Në verë do të kthehem tek Anderlecht. Shpresoj të gjejmë një zgjidhje për të mirën time dhe të klubit”, tha Abazaj./abcnews.al
Vladimir Prenga09:44 | 19/03/2020
Skënder Gega zbarkoi dy ditë më parë në Jordani, aty ku do të drejtojë skuadrën e Al Faisaly. Trajneri kampion me Partizanin sezonin e fundit në Superiore, ka folur për këtë lëvizje të bërë në një lidhje direkte me emisionin “Fan Zone” në Supersport 1.
“Në Jordani më ka dërguar menaxheri dhe miku im, Ilir Halili. Në Shqipëri ekipet i bëjnë vetë të gjitha, kontaktet me lojtarët dhe gjithçka tjetër. Kam ardhur në një ekip kampion dhe me shumë histori. Firmën e kam hedhur në letër përpara dy ditësh”, shprehet Gega.
Sigurisht ai është ngacmuar gjatë emisionit, nëse do të merrte ndonjë lojtar shqiptar tek Al Faisaly. “Nëse do të duhet, duke parë edhe nevojat në klubin e ri, do të merrja çdo lojtar shqiptar që e meriton për ta sjellë këtu”, shtoi Gega.
Sërish Kukësi dhe trajneri nuk mban mëri e as nuk i konsideron armiq verilindorët, që për të dytën herë bisedojnë me të dhe në fund vendosin t’ia besojnë dikujt tjetër pankinën. “Njeriu mëson kur kalon një moshë, nuk dua t’i kthehem gjërave. U ula me Nexhipin dhe Gjicin, ata morën vendimin e tyre dhe shpresoj t’u eci mbarë. Nuk kam asnjë armik në Shqipëri”, përfundon Gega. /abcnews.al
Vladimir Prenga08:59 | 19/03/2020
Nderim Nexhipi, drejtori sportiv i Kukësit, një ditë më parë foli në emisionin “Fan Zone”, që transmetohet në Sport News në platformën Supersport. Ish-mesfushori fillimisht foli për situatën që ka përfshirë vendin tonë dhe për ndalimin e futbollit.
“Është një moment i vështirë, nga ata që ndodhin shumë rrallë. Më vjen mirë që autoritetet reaguan shpejt dhe ndalën futbollin, pasi në këto çaste vëmendja duhet të përqendrohet te shëndeti i njerëzve”, tha fillimisht Nexhipi, i cili mendon se kjo periudhë e ndihmon Kukësin të plotësohet me gjithë grupin.
“Në fakt nuk po kalonim aspak një moment të mirë dhe kjo kryesisht për shkak të dëmtimeve të njëpasnjëshme dhe pezullimeve me kartonë, pasi prej kohësh nuk po luanim me formacionin më të mirë. Besoj se kjo periudhë do të na ndihmojë të rikuperojmë të gjithë lojtarët dhe të jemi gati për sprintin final”.
Në lidhje me mbylljen e garës, Nexhipi shton: “Me aq informacione sa kam unë, UEFA ka vendosur që të gjithë kampionatet të përfundojnë brenda 30 qershorit dhe besoj se kemi kohë mjaftueshëm të mbyllim kampionatin rregullisht, duke parashikuar edhe një rifillim në javët e fundit të prillit apo të parat e majit”.
Si ndikon ky pushim i gjatë tek ekipet? Drejtori Sportiv i Kukësit e komenton kështu: “Është një aspekt për t’u marrë në konsideratë, por mendoj se djemtë janë seriozë dhe po mundohen të ruajnë formën edhe gjatë kësaj kohe izolimi. Shumë shpejt do të rifillojmë edhe stërvitjen, për të qenë në formë sa më të mirë në fazën finale të kampionatit”.
Ngjeshja e kalendarit është e pashmangshme, por Nexhipi nuk e shikon si problem diccka të tillë dhe këtë e bazon tek organika që Kukësi ka: “Mendoj se kemi një organikë të plotë dhe jo vetëm 11 lojtarë. Mendoj se çdo lojtar i yni është i aftë të luajë në formacion, ndaj them se do ta përballojmë më së miri”.
Në fund Nexhipi flet edhe për objektivin titull dhe shanset që Kukësi ka: “Kemi bërë një sezon të mirë dhe për një farë kohe ishim edhe të shkëputur në krye, por më pas erdhi Tirana, që po bën mjaft mirë dhe ka fituar shumë ndeshje radhazi, duke u shkëputur në krye.
Besoj te titulli, pasi kemi edhe 10 javë për të luajtur, mes tyre edhe ndeshje direkte me Tiranën, ndaj nëse bëjmë edhe ne të njëjtën gjë si ata, duke fituar shumë takime radhazi, titulli nuk është i pamundur”. /abcnews.al
Veronik Istrefaj19:37 | 18/03/2020
Mesfushori i Kukësit, Vesel Limaj, i është bashkuar sfidës “Gol në shtëpi” dhe me videon e tij, ka treguar saktësinë që ka. Por, ka treguar dhe sensin e tij të humorit, si dhe aftësitë e tij në aktrim.
Numri 8 i verilindorëve shihet teksa bën punët e tij të shtëpisë, duke pastruar oborrin me një fshesë. Më pas, Limaj merr një top dhe pasi e mban në ajër disa herë, gjuan dhe e çon në koshin e mbeturinave, duke treguar një saktësi fantastike.
Aktrimi i mesfushorit nuk mbaron këtu, pasi në mënyrë epike, merr sërish fshesën në dorë dhe vazhdon rutinën e punëve të shtëpisë. Një video për të mos u humbur./abcnews.al
Vladimir Prenga12:58 | 18/03/2020
Godberg Cooper u transferua në janar te Kukësi dhe ka provuar të debutojë në Superiore. Shijen e golit në kampionat ende nuk e ka shijuar, por synon që të realizojë sa më shumë. “Kampionati është i fortë, shumë fizik. Po ambientohem dhe dua të shënoj sa më shumë gola dhe të bie në sy, e pse jo më pas të kthehem sërish në Itali”, tregon sulmuesi shtatlartë në intervistën e dhënë për “Tuttomercatoweb”.
Si shumica e lojtarëve, edhe Cooper ka shembujt e tij: “Modeli im është Duvan Zapara, për mënyrën se si lëviz. Më pëlqejnë edhe Lula e Balotelli si futbollistë. I shikoj, i studioj dhe mundohem të mësoj”. Sulmues ka qenë pjesë e moshave te skuadra e Atalanta, ndaj edhe i pëlqen Zapata. Afrikani, me pasaportë italiane, familjen e ka në vendin fqinj dhe do kishte dashur të shkonte pranë tyre.
“Familja ime jeton në Itali, në krahinën e Bergamos dhe do doja të kthehesha, por nuk mundem. Pastaj gjithashtu po shikoj që atje rastet po shtohen dhe është më mirë të qëndroj këtu”, shton sulmuesi, i cili pyetet edhe për situatën në Shqipërisë dhe ndalimin e kampionatit.
“Ishim në hotel të premten, kur u vendos për ndalimin e kampionatit. Jam i shqetësuar, shikoj lajmet në mediat italiane dhe numri i të prekurve vetëm rritet. Personalisht jam mirë, i izoluar vullnetarisht. Nuk kam simptoma, por mendja ime është në Itali. Jam në kontakt me familjen time, nuk kalon asnjë ditë pa folur.
Bergamo është zona më e prekur dhe është në gjunjë nga kjo situatë, por do të ngrihet përsëri. Duhet të respektojmë udhëzimet e qeverisë, ndryshe bëhet e ndërlikuar. Sa i përket stërvitjes, gjithccka është pezulluar”, mbyll Cooper. /abcnews.al
Veronik Istrefaj19:30 | 17/03/2020
Presidenti i nderit i klubit të Kukësit, si dhe Kryetari i Bashkisë Kukës, Safet Gjici, ka dhënë një intervistë për mediat lokale, aty ku ka pasur dhe një episod të sikletshëm. Gjici kishte një thirrje për qytetarët e Kukësit, sidomos për moshat e treta, që të mos dilnin nga shtëpia dhe të mos rrezikonin infektimin me Koronavirus.
Edhe pse nuk ka ende asnjë rast zyrtar pozitiv me Koronavirus në Kukës, Kryetari i Bashkisë i ka kërkuar qytetarëve të vetë-karantinohen në shtëpi.
Pikërisht në këtë fjalë, Gjici është ngatërruar dhe u mundua ta kalojë këtë moment të sikletshëm duke e ulur zërin dhe duke dalë menjëherë të fjalia e radhës. Fjala është komplekse dhe e gjatë, ndoshta dhe Gjici nuk ka faj, por momenti mbetet gazmor…/abcnews.al
ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore.
NUIS/NIPT K01711004FKontaktTelefono
23:48 | 02/04/2020
23:30 | 02/04/2020
