Loading ...
Në jug të Libanit, të paktën tetë persona janë vrarë si pasojë e sulmeve ajrore të ushtrisë së Izraelit, në një valë të re përshkallëzimi që po ndodh, pavarësisht marrëveshjes së armëpushimit të ndërmjetësuar nga Shtetet e Bashkuara dhe të zgjatur deri në fillim të korrikut.
Sipas agjencisë shtetërore libaneze të lajmeve NNA, avionë luftarakë izraelitë goditën fshatin Doueir, ku u vranë pesë persona dhe u plagosën dy të tjerë, ndërsa disa shtëpi u shkatërruan plotësisht nga bombardimet.
Në një sulm tjetër pranë një spitali në fshatin Tibnin, u raportuan dy viktima të tjera, ndërsa në zonën e Burj Shemali në rajonin e Tirit, një person u vra nga një sulm me dron, ndërsa po lëvizte me motor. Gjithashtu, Kryqi i Kuq njoftoi se ka gjetur trupin e një personi në periferi të Shebaa-s në rajonin Nabatieh.
Sulmet vijnë kur vetëm një ditë më parë në jug të Libanit u vranë të paktën 16 persona, përfshirë gra dhe fëmijë, sipas Ministrisë së Shëndetësisë libaneze. Situata në terren mbetet e tensionuar, ndërsa përplasje janë raportuar edhe mes forcave të Hezbollahut dhe ushtrisë izraelite në disa zona kufitare, përfshirë rajonet Haddatha, Biyyada dhe Rashaf.
Sipas raportimeve nga terreni, ushtria e Izraelit po zgjeron operacionet ushtarake edhe jashtë jugut të vendit, duke goditur zona në Luginën e Bekaa-s në lindje të Libanit, një rajon ku Hezbollahu ka ndikim të fortë. Banorë të zhvendosur nga zonat e sulmuara kanë deklaruar se po përballen me shkatërrime të mëdha dhe zhvendosje masive të popullsisë.
Autoritetet libaneze raportojnë se që nga 2 marsi, mijëra persona janë vrarë dhe plagosur në të gjithë vendin, ndërsa mbi 1.6 milionë banorë janë detyruar të largohen nga shtëpitë e tyre, për shkak të përshkallëzimit të konfliktit. Situata humanitare në jug të Libanit po përkeqësohet ndjeshëm, ndërsa sulmet dhe përplasjet ushtarake vazhdojnë, pa shenja të qarta të uljes së tensioneve.
