Kryetari i bashkisë së Beratit, Ervin Demo thotë se situata nga zjarret në Shpirag është vënë nën kontroll. Në një lidhje live për “Newsline” me gazetaren Viol Xhafaj, Demo theksoi se aktualisht është një vatër aktive në zonën e Palikështit ndërsa shtoi se nuk ka rrezik për asnjë banesë.
“Situata është më e qetë. Kemi kaluar një moment delikat. Ndodhem në Starovë, kanë qenë disa fshatra në këtë zonë që kanë qenë të prekur. Në këtë moment që flasim, kemi një vatër aktive në zonën e Palikështit por në tërësi situata është nën kontroll.
Duke filluar që nga dje kur situata filloi të ndërlikohej dhe sot për shkak të kushteve atmosferike pati një përhapje të zjarrit. Fatmirësisht deri tani nuk është se kemi dëme të konsiderueshme. Në përgjithësi zjarri ka qenë në pjesë të zhveshura të kodrave dhe kjo ka bërë që dëmet të jenë më të limituara. Nuk ka asnjë vatër zjarri pranë banesave.”, theksoi ai. /abcnews.al
