Pandemia ka rënduar nga ana financiare edhe njësitë e qeverisjes vendore në vend. Kjo e bën të pamundur heqjen e taksave për sektorin e turizmit një kërkesë kjo e bërë prej operatrëve turistik.
Kreu i Shoqatës së Bashkive Agron Haxhimali thekson se e vetmja mundësi është që bashkitë të ulin taksat, ndërsa i bën apel qeverisë për mbështetje financiare sidomos për 11 bashkitë që kanë vijë bregdetare .
“Duhet të pranojmë që jemi në vështirësi, që kemi kufizime. Duhet të pranojmë që paketat e ndihmës që ka dhënë qeveria shqiptare, nuk respektojnë parimin e mjaftueshemërisë.
Bashkitë duhet të gjejnë rrugë të reja. Duhet bërë një analizë e re, e qartë, një plan zhvillimi ekonomik-rural. Duhet bërë një hapje jashtëzakonisht dinamike në këtë moment. Bashkitë duhet të zgjerojnë bazën e takasave, por edhe duhet të ulin nivelin e tyre”, theksoi Haxhimali.
Gjatë këtij viti bashkitë do të ofrojnë më pak shërbime dhe ulje të investimeve pasi edhe situata e mbledhjes së të ardhurave ka qenë negative.
“Nuk pres rritje të ardhurash në Bashki, investime, cilësi, apo sasi shërbimesh më të mëdha. Gjithashtu nuk pres që do kalojmë në shlyerjen e borxheve të detyrimeve të prapambetura”, tha ai.
Turizmi në vend është goditur rëndë si pasojë e pandemisë pasi ka pasur një anullim të prenotimeve. Gjirokastra është një ndër bashkitë e para që ka ofruar lehtësim të pagëses së taksave për sektorin turistik./abcnews.al
