Shkëmbi: Nuk shënuam nga mungesa e eksperiencës, Teutës i duhen pikët

schedule21:06 - 30 Shtator, 2022

schedule 21:06 - 30 Shtator, 2022

Bledi Shkëmbi duhet të presë për të festuar fitoren e parë. Teuta barazoi 0-0 ndaj Vllaznisë dhe korçari në Oversport deklaroi: “Na vjen keq. Në pjesën e parë kishim momentin tonë për të shënuar. Sot kishim më shumë grintë. Ekipi ishte në ekuilibër. Siç e thatë ju mungon goli, mungojnë pikët. Ndoshta dhe nga mungesa e eksperiencës nuk arritëm të shënonim”.

“Dëshira ime është të luaj me dy sulmues. Kanë të bëjnë shumë dhe lojtarët që kemi të gatshëm. Nuk janë në maksimumin e tyre. Në çdo ndeshje do të shohim mundësitë fizike, më pas do të vendosim si do të luajmë. Në pjesën e parë dyshja më pëlqeu”.

“Në këto momente nuk do të doja të humbja pikë. Edhe sikur të luajmë keq, na duhen pikët. E dimë sa të rëndësishme janë ato. Unë jam i kënaqur nga ajo që po japin lojtarët në stërvitje. Bëmë një pjesë të parë të mirë.

Te kundërshtari fituam në 35 minuta çdo top të kthyer. Mendoj se duhet të bënim më mirë për sa i përket finalizimit. Disa lojtarë vuajtën gjendjen fizike. Unë dua të uroj Vllazninë. Terapinë psikologjike e bën kur je më i qetë. Lojtarët vetë janë ata që e nxjerrin ekipin nga kjo situatë”.

“Mendoj se kjo skuadër ka lojtarë të mirë, me goxha eksperiencë. Mendoj se kam bërë mjaft mirë, me mundësitë që kam pasur. Dua që të kemi qarkullimin e topin. Dëshira tjetër gjë, mundësitë tjetër gjë. në këto momente na duhet vetëm të shënojmë dhe të marrim pikë”, përfundoi Shkëmbi. / abcnews.al