Në këtë kohë kaq të vështirë të përhapjes së koronavirusit dhe ankthit të qytetarëve që kërkojnë të blejnë maska mbrojtëse, ka nga ata që synojnë të përfitojnë nga koronavirusi dhe ankthi që kap vendin, për të bërë biznes. Edhe nëse kjo do të thotë të rrezikosh jetë njerëzish. Një qytetar francez dyshohet se ka shitur maska të skaduara online në Le Bon Coin.
Banori i Ain u arrestua në 21 shkurt si pjesë e një hetimi nga brigada e kërkimit Bourg-en-Bresse. Duke e paraqitur veten si “pronar biznesi”, ai dyshohet se ka shitur në internet 200,000 maska mbrojtëse të cilat kanë skaduar gjashtë vjet më parë.
Në ditën e arrestimit të tij, hetuesit sekuestruan 181 kuti secila që përmbajnë 500 maska – mbrojtëse për të cilat vazhdon të ketë kërkesë të lartë për të luftuar përhapjen e koronavirusit – të cilat ende nuk ishin shitur, thotë Le Progrès.
Bëhet fjalë për pothuajse 100,000 njësi që i përkisnin një kompanie të specializuar në prodhimin e maskave dhe veshjeve të sigurisë.
Tregtarët dhe bashkëpunëtorët e tij të mundshëm thuhet se kanë falsifikuar datat e skadimit të tyre me pullë për të treguar se maskat ishin akoma të vlefshme deri në gusht 2022. I dyshuari është lënë i lirë ndërkohë që hetimet vazhdojnë për të parë sesa larg kishte shkuar shitja e maskave të skaduara.
Ndërkohë, tre persona u arrestuan të enjten e kaluar në Maisons-Alfort, në Val-de-Marne, të dyshuar se ishin të përfshirë në trafikimin e maskave mjekësore të skaduara. Policia sekuestroi jo më pak se 40,000 materiale mbrojtëse të cilat ata synonin t’i shisnin tek individë të ndryshëm.
Tre të dyshuarit, tek të njëzetat, u arrestuan nga policia, e cila u lajmërua nga një grua në të 50-tat, e cila u tha oficerëve se njerëzit që punonin për një kompani të vendosur në katin e parë të ndërtesës së saj, po nxirrnin kuti nga një kamion deri në orën 4 të mëngjesit.
Ajo zbuloi se ata hidhnin kuti boshe të maskave FFP2 në çanta të mëdha plehrash.
Data e skadimit në këto kuti është shtator 2012. Policia përgjoi tre persona. Përveç maskave, oficerët kapën një tretës, i cili ndoshta ishte përdorur nga të dyshuarit për të hequr datën e skadencës nga maskat. Sipas informacionit, maskat e skaduara ishin blerë për 1 euro copa në Marsejë. /abcnews.al
