Ashtu siç ishte parashikua, në orën 18:00, në mitikun e Dortmundit, “Signal Iduna Park”, Turqia dhe Gjeorgjia do të nisnin aventurën e tyre, në Kampionatin Evropian të futbollit, me “Kryqëtarët” gjeorgjianë, që kishin edhe debutimin e tyre historik, në një turne madhor të futbollit, pasi mundën në fazën play-off, Greqinë, dikur fituese të këtij kompeticioni.
Mirëpo, një episod i shëmtuar ka ndodhur në shkallët e stadiumit përpara fillimit të ndeshjes, me tifozët e dy kombëtareve në fjalë që janë përleshur keq me njëri-tjetrin. Ultras të të dyja palëve u përleshën në vendin ku bashkohen dy tribuna, pranë vijës anësore të fushës, ndërsa u desh ndërhyrja e policisë dhe rojeve private të sigurisë për të vendosur rregullin.
Kjo është hera e parë që tifozët përplasen brenda një stadiumi gjatë Kampionatit Europian. Turqia dhe Gjeorgjia ndodhen në Grupin F në Euro 2024, ndërsa dy vendet kanë pasur luftëra në të kaluarën, dhe pretendime territoriale ndaj njëra-tjetrës. /i.m /abcnews.al
