Loading ...
Një shtetas dominikan mbeti i plagosur me armë zjarri nga një agjent i Shërbimit Amerikan të Emigracionit dhe Doganave, gjatë një operacioni arrestimi në lagjen Marble Hill, në Bronx të Nju Jorkut. Ngjarja ka shkaktuar reagime të forta nga drejtuesit lokalë dhe organizatat që mbrojnë të drejtat e emigrantëve.
Departamenti amerikan i Sigurisë Kombëtare e cilësoi ndërhyrjen si një operacion të shënjestruar të kontrollit të emigracionit. Ndërkohë, Policia e Nju Jorkut konfirmoi se në incident u përfshinë agjentë federalë, por sqaroi se efektivët e saj nuk ndodheshin në vendngjarje dhe nuk morën pjesë në operacion. Shtetasi dominikan, i cili u plagos brenda makinës së tij, është dërguar në një spital në zonë dhe nuk ndodhet në rrezik për jetën.
Kryebashkiaku i Nju Jorkut, Zohran Mamdani, e cilësoi incidentin si një ngjarje jashtëzakonisht të rëndë. Sipas tij, agjentët federalë kishin rrethuar një automjet ku ndodheshin burri dhe një fëmijë pesëvjeçar, përpara se të qëllonin disa herë me armë zjarri. Fëmija nuk raportohet të jetë lënduar.
Mamdani bëri të ditur se kishte kontaktuar presidentin amerikan, Donald Trump, për t’i kërkuar përfundimin e operacioneve të Shërbimit Amerikan të Emigracionit dhe Doganave. Edhe guvernatorja e shtetit të Nju Jorkut kërkoi sqarimin e plotë të rrethanave të ngjarjes. Ajo u bëri thirrje autoriteteve federale të publikojnë një raport transparent mbi incidentin. Ndërkohë, Koalicioni i Emigracionit të Nju Jorkut reagoi ashpër përmes presidentit të tij, i cili kërkoi nisjen e menjëhershme të një hetimi dhe publikimin e pamjeve nga kamerat trupore të agjentëve të përfshirë.
Incidenti nxiti protesta në zonën ku ndodhën të shtënat. Qytetarët e mbledhur kundërshtuan operacionet e Shërbimit Amerikan të Emigracionit dhe Doganave, duke brohoritur slogane kundër pranisë së agjentëve federalë dhe më pas marshuan drejt spitalit ku po trajtohej i plagosuri.
Situata u tensionua kur një grup protestuesish bllokoi një kryqëzim pranë hyrjes së spitalit, duke penguar qarkullimin e automjeteve. Gjatë përpjekjeve të policisë për të vendosur barriera metalike dhe për të lejuar kalimin e ambulancave, disa protestues u përplasën me barrierat dhe hodhën shishe uji në drejtim të efektivëve. Pas përshkallëzimit të situatës, policia ndërhyri dhe kreu disa arrestime.
