Vllaznia do të përballet ditën e sotme në transfertë me Egnatias, në kuadër të javës së tetë të “Abissnet Superiore”, ora 13:45.
Një takim interesant dhe i baraspeshuar duke marrë parasysh edhe pozitat e skuadrave në tabelën e klasifikimit.
Të dy skuadrat do të luajë më njëra-tjetrën për fitore, që do të thotë vendi i tretë.
Në konferencën për shtyp, para ndeshjes, gardiani i Vllaznisë, Bojan Zogovic, është shprehur i bindur se shkodranët do të marrin 3 pikët e kthesën në ndeshjen me Egnatian.
“Mendoj se e kemi nisur mirë, por në ndeshjet e fundit kemi pasur disa probleme. Megjithatë, mendoj që jemi një ekip që ka mjaft cilësi dhe personalitet. Kemi gabuar, sidomos në mënyrën sesi kemi luajtur.
Në këtë ndeshje duhet ta mbajmë më shumë topin e pastaj të shohim drejt portës kundërshtare për të shënuar. Vërtet këtë sezon po pësojmë shumë, por të mos harrojmë se sezonin e kaluar qëndruam 20 ndeshje pa pësuar gol.
Po përqendrohemi te ndeshja e radhës dhe do të shkojmë të marrim tri pikët. E di që kemi pësuar shumë gola dhe kjo nuk është gjë e mirë, por kemi bërë analizat tona dhe mendoj që do të jemi më mirë. Mendoj që duhet të luajmë në mënyrë të zgjuar dhe inteligjente. Qëllimi ynë është të mos pësojmë asnjë gol, të arrijmë të shënojmë dhe t’ia dalim të marrim rezultat pozitiv”, deklaroi portieri Zogovic. /f.a/abcnews.al
