Loading ...A mund të forcojmë shëndetin e familjes përmes ushqimeve të thjeshta, sezonale dhe të përballueshme? Nutricionistja Shkëlqime Sula sjell në vëmendje tre produkte që meritojnë më shumë vend në tryezat tona: sardelet, thanat e kuqe dhe kungullin.
Sardelet janë ndër burimet më të vlefshme të proteinave, acideve yndyrore omega-3, vitaminës B12 dhe vitaminës D. Të freskëta, të ngrira apo të konservuara, ato ruajnë një pjesë të rëndësishme të vlerave ushqyese dhe, kur konsumohen me kocka, ofrojnë edhe kalcium. Por cilat janë ndryshimet mes tyre dhe sa shpesh duhet t’i përfshijmë në dietën tonë?
Në fokus janë edhe thanat e kuqe, frutat me shije karakteristike, të pasura me përbërës antioksidues. Shkenca po studion potencialin e tyre për shëndetin, por a mund të quhen vërtet “antibiotik natyral”? Çfarë dimë për ndikimin e tyre në imunitet, tretje dhe kontrollin e sheqerit në gjak?
Një tjetër protagonist i vjeshtës është kungulli, burim i beta-karotenit, fibrave dhe vitaminave që ndihmojnë në ruajtjen e shëndetit të syve dhe funksionimin normal të organizmit. Nga supat e ngrohta te gatimet në furrë, kjo perime mund të bëhet pjesë e një menuje të shëndetshme dhe të larmishme.
Por përtej ushqimeve të veçanta, mesazhi kryesor lidhet me edukimin ushqimor, i cili nis që në fëmijëri. Fëmijët duhet të mësojnë jo vetëm çfarë hanë, por edhe si ndikojnë zgjedhjet e tyre në shëndetin e së ardhmes.
Sardelet, thanat dhe kungulli dëshmojnë se ushqyerja e shëndetshme nuk kërkon domosdoshmërisht produkte të shtrenjta. Sekreti është të zgjedhim ushqimet e sezonit, të kufizojmë produktet shumë të përpunuara dhe të ndërtojmë zakone të mira që në tryezën familjare./abcnews.al
