Ministria e Arsimit njoftoi pak minuta më parë se sipas vendimit të marrë sot nga Taska Forca kundër koronavirusit mbyllja e shkollave do të zgjasë deri në 23 mars.
Vendimi erdhi pas zbulimit të dy rasteve me koronavirus mbrëmjen e djeshme në Shqipëri.
Ndërkohë, është vendosur pezullimi i fluturimeve me qytetet e veriut të Italisë ku është epiqendra e koronavirusit.
Pak më parë në spitalin Infektiv mbërriti edhe një person tjetër i dyshuar me koronavirus.
Postimi i plotë i ministres
U vendos nga Task Forca për Koronavirusin që të mbyllen institucionet arsimore për periudhë dy javore, deri më 23 mars 2020.
Kjo për arsye frenimi të përhapjes së virusit COVID-19, i cili është shfaqur në dy raste në Shqipëri. Masa është parandaluese dhe frenuese – nuk ka asnjë nevojë e arsye për panik. Po tregohemi shumë të kujdesshëm që të zvogëlojmë maksimalisht mundësinë e përhapjes së këtij virusi.
Mbani mend që fëmijët dhe të rinjtë nuk janë grupmoshë e rrezikuar nga virusi, por mund të jenë bartës. Ndaj, do të pezullohet mësimi në institucionet arsimore.
Masat që secili prej nesh duhet të ndërmarrë individualisht:
• Të lajmë duart shpesh për 20 sekonda;
• Të evitojmë takimin deri në 1 m largësi;
• Të evitojmë grumbullimet e njerëzve.
Për më shumë informacion, pak më vonë do të mbaj një konferencë për shtyp.
