Evan Gershkovich, një gazetar amerikan për Wall Street Journal, i cili u arrestua në Rusi dhe u akuzua për spiunazh në mars të vitit 2023, thuhet se është liruar si pjesë e një shkëmbimi masiv të të burgosurve, i cili po vazhdon midis Shteteve të Bashkuara, Rusisë dhe disa vendeve të tjera.
Evan raportohet të jetë rrugës për në New York.
Gazetari i Wall Street Journal mund të jetë midis 20 dhe 30 të burgosurve politikë të shkëmbyer mes dy vendeve, sipas Moscow Times. Pjesë e kësaj marrëveshje është edhe Gjermania.
Raportimi vjen në mes të spekulimeve të raportuara brenda Rusisë se një shkëmbim i të burgosurve me pozicione të larta mund të ndodhë, pasi disa prej tyre u larguan nga burgjet e tyre dhe u zhvendosën në një vend anonim.
Sipas gazetës ruse, të burgosur të tjerë që mund të jenë pjesë e marrëveshjes përfshijnë njerëz të lidhur me Alexei Navalny, kundërshtarin politik të Vladimir Putin, i cili u gjet i vdekur në një kamp burgu në shkurt.
Nëse raportet për shkëmbimin e deri në 30 të burgosurve janë të vërteta, ky do të ishte shkëmbimi më i madh i të burgosurve midis Shteteve të Bashkuara dhe Rusisë që nga fundi i Luftës së Ftohtë.
Shkëmbimi i fundit i të burgosurve midis Moskës dhe Perëndimit daton në dhjetor 2022, kur basketbollistja amerikane Brittney Griner u kthye në Shtetet e Bashkuara në këmbim të tregtarit të armëve Viktor Bout.
Dje Kremlini nuk iu përgjigj pyetjeve në lidhje me këtë mundësi, por dihet prej kohësh se Putini do të dëshironte “kthimin” e Vadim Krasikov, një agjent i inteligjencës së Moskës, i arrestuar aktualisht në Gjermani për vrasjen e një militanti çeçen.
/abcnews.al
