Kryetari i Partisë së Lirisë Ilir Meta ka dalë në një konferencë për mediat për të adresuar çështjen e hakërrimit të disa prej sistemeve shqiptare që përmbajnë të dhëna sensitive të vendit. Kreu i PL-së i bëri thirrje Prokurorisë që të nisë urgjentisht një hetim të thelluar për evidentimin e përgjegjësive të qeverisë dhe institucioneve të tjera.
Sipas Metës, përgjegjës kryesor për hakerimin e të dhënave sensitive është kryeministri Edi Rama, i cili sipas tij, legjitimoi edhe hakerimin e parë, atë të të dhënave që rrodhën para zgjedhjeve të prillit të vitit 2021 dhe vënia e tyre në dispozicion të patronazhistëve.
“ Rama në 6 maj 2022, kërkoi t’u impononte bankave kryerjen e shërbimeve nëpërmjet e-albania. Gjë që u refuzua prerë nga banka e Shqipërisë e banka të tjera. Kjo kërkesë e çuditshme vinte në një kohë hakerimesh. Ekspertët theksojnë që hakerat kanë depërtuar në të dhënat e shqiptarëve që në maj 2021, dhe janë kryer veprime të tjera hakërruese, tetor 2021, janar 202. Kërkojmë të bëhet transparencë e plotë se çfarë ka ndodhur realisht. Transparencë me planin e masave dhe garantimin e sigurisë së sistemeve. Prokuroria të bëjë urgjent një hetim të thelluar e serioz, për evidentimin e përgjegjësive të qeverisë e institucioneve të tjera…” /abcnews.al/
