Loading ...
Në prag të 25-vjetorit të sulmeve terroriste të 11 Shtatorit 2001, qielli mbi portin e Nju Jorkut u kthye në një memorial gjigant drite. Kullat Binjake u rikthyen për pak minuta në horizontin e Nju Jorkut, këtë herë të krijuara nga mijëra dronë në qiell.
2,977 dronë të ndriçuar u ngritën mbi portin e Nju Jorkut, duke formuar fillimisht një spirale dhe më pas siluetën e dy kullave që u shkatërruan në sulmet e 11 Shtatorit. Numri i dronëve ishte simbolik: një për secilin prej 2,977 njerëzve që humbën jetën atë ditë.
Instalacioni, i quajtur “2,977 Lights Over New York Harbor”, u realizua nga drejtori kreativ Addison Mehr, në bashkëpunim me familjarë të viktimave, të mbijetuar dhe pjesëtarë të ekipeve të emergjencës.
Shfaqja u konceptua në lidhje me “Tribute in Light”, dy rrezet e fuqishme që çdo vit ndriçojnë qiellin mbi Lower Manhattan në përkujtim të viktimave. Dronët qëndruan në qiell për disa minuta, ndërsa instalacioni u shoqërua me muzikë, përfshirë veprën On the Transmigration of Souls të kompozitorit John Adams, shkruar pas sulmeve të 11 Shtatorit.
Më 11 shtator 2001, 19 terroristë të al-Qaeda-s rrëmbyen katër avionë pasagjerësh. Dy prej tyre u përplasën me Kullat Binjake në Nju Jork, një me Pentagonin, ndërsa avioni i katërt u rrëzua në Pensilvani pasi pasagjerët tentuan të merrnin kontrollin. Në sulme humbën jetën 2,977 njerëz. Ngjarja ndryshoi përgjithmonë sigurinë dhe politikën globale dhe shënoi fillimin e një periudhe të re në luftën kundër terrorizmit.
Pas 25 vitesh, Kullat Binjake u shfaqën sërish mbi Nju Jork, jo prej çeliku dhe xhami, por prej 2,977 dritash – një homazh për çdo jetë të humbur më 11 Shtator.
