Në një deklaratë për media drejtori i Autoritetit Rrugor Shqiptar, Afrim Qendro, njoftoi monitorimin e urave në vend nga ARRSH si dhe gjendjen në fazën përfundimtare të projektit, i cili do të identifikojë dhe ndërhyjë në urat më problematike në vend. Mori shkas nga tragjedia italiane në urën Morandi.
“Ne nuk jemi në panik, nuk jemi as në emergjencë, nuk jemi as në alarm. Jemi në monitorim të vazhdueshëm. Kemi 1200 vepra arti, ura me gjatësi të vogla ose të larta të cilat mirëmbahen dhe monitorohen nga ARRSH. Ka një kontroll periodik, dy herë në vit për të gjithë veprat e artit dhe kemi një ndërhyrje të vazhdueshme të mirëmbajtjes të të gjitha veprave të artit të cilat gjatë periudhës që mirëmbahen shfaqin probleme. Janë përmirësuar me projekte të miratuara nga ARRSH 30 ura”, u shpreh Afrim Qendro.
Sa i përket situatës së krijuar nga reshjet e vitit të kaluar në urën e Drojës dhe të Zeblakut, kjo e fundit thekson Qendro sot është në funksion te plotë, e sa i përket urës së Drojës…
“Ne jemi në 60-70% të punës në urën e Drojës. Jemi në momentin e vendosjes së trarëve dhe besojmë se në një afat prej dy muajsh edhe ura e Drojës të mbarojë”, theksoi Qendro.
Projekti per identifikimin dhe ruajtjen e urave me problematike ne vend eshte ne faze finale sipas kreut te ARRSH.
“Dua t’ju them që gara është në proces final. Jemi në përfundim, brenda dy javëve ne do të kemi kontratën mme kompaninë fituese e cfila do të bëjë projektin dhe të gjitha elementet teknikë që duhet të bëjmë ne për të gjitha urat sipas listës së paraqitur dhe atje ku do të duhet. Ndërhyrje, plotësime, përmirësime ose do të na duhet urë e re, këtë gjë do ta na e japë projekti i ri, i cili do të miratohet dhe në funksion të kësaj ne do të kërkojmë në buxhetin e vitit të ardhshmëë që të gjitha këto ura t’i buxhetojmë dhe të ndërhyjmë sipas një projekti të miratuar”, tha Qendro.
Ministria e Infrastrukturës ka ngritur një grup pune me përbërje nga Autoriteti Rrugor, Instituti i Ndërtimit, Drejtoria e Emergjencave dhe Fakulteti i Inxhinerisë së Ndërtimit për të bërë një inspektim të përgjithshëm për të gjithë urat, kjo sipas drejtorit të Autoritetit Rrugor bëhet për të ndihmuar pushtetin lokal, i cili pas ndarjes së rrjetit rrugor shqiptar është përgjegjës për një pjesë të rëndësishme tyre edhe pse sipas tij nuk kanë kapacitetet apo ekspertët e duhur për këtë menaxhim./abcnews.al
