Loading ...
DURRËS- Operatorët turistikë kanë dalë sot në sheshin qendror të Durrësit, ku kanë ngritur shqetësimin për ndikimin që protestat e zhvilluara në Tiranë po kanë në ecurinë e sezonit turistik.
Sipas tyre, situata e krijuar ka sjellë pasiguri te turistët e huaj dhe partnerët ndërkombëtarë, duke ndikuar drejtpërdrejt në rezervimet për pushime në Shqipëri.
Përfaqësuesit e sektorit deklaruan se rreth 40% e rezervimeve janë anuluar gjatë periudhës së fundit, duke shkaktuar humbje të konsiderueshme për bizneset turistike.
Ata thanë gjithashtu se dy kompani partnere, një nga Gjermania dhe një tjetër nga vendet skandinave, janë tërhequr nga bashkëpunimi si pasojë e situatës së krijuar nga protestat.
Operatorët thanë për “ABC News”, se pamjet e transmetuara nga protestat kanë krijuar perceptim pasigurie te turistët, veçanërisht te ata që planifikonin të vizitonin Shqipërinë për herë të parë.
Ata theksuan se turizmi është një sektor shumë i ndjeshëm ndaj zhvillimeve politike dhe sociale, ndërsa kërkuan marrjen e masave për të garantuar stabilitet dhe për të mbrojtur imazhin e vendit si destinacion turistik.
Operatorët paralajmëruan se, nëse situata vazhdon, pasojat mund të ndihen gjatë gjithë sezonit veror, duke ndikuar jo vetëm në Durrës, por edhe në destinacione të tjera turistike në vend.
/abcnews.al/
