Qeveria e Bullgarisë dhe Polonisë u bëri thirrje qytetarëve që ndodhen në Rusi, të largohen urgjentisht nga atje.
Ministria e Punëve të Jashtme e Republikës së Bullgarisë tha në një deklaratë të martën se “rekomandon që shtetasit bullgarë në Rusi të shqyrtojnë mundësinë e largimit nga vendi sa më shpejt të jetë e mundur, duke përdorur mjetet e transportit që kanë aktualisht në dispozicion”.
Gjithashtu Ministria e Jashtme polake ka bërë një deklaratë të ngjashme, raporton gazeta polake TVP.
“Ne rekomandojmë që qytetarët e Republikës së Polonisë që qëndrojnë në territorin e Federatës Ruse të largohen nga territori i saj duke përdorur mjetet tregtare dhe private në dispozicion,” thuhet në deklaratë, shkruan The Guardian.
Thirrjet e dy vendeve për qytetarët e tyre vijnë pas deklaratave të forta që presidenti rus, Vladimir Pution bëri një javë më parë, ku shpalli mobilizim të pjesshëm të ushtrisë ruse. Që prej asaj dite mijëra qytetarë rusë janë ngritur në protesta kundër Putinit, duke thënë se nuk duan të luftojnë dhe të vdesin për Putinin./abcnews.al/
