Policia ka reaguar zyrtarisht për arrestimin e pedofilit në Lezhë, i demaskuar nga emisioni “Piranjat” në ABC. “Blutë” e Lezhës bëjnë të ditur se 45-vjeçari, banues në fshatin Tale është arrestuar “Ngacmimi seksual” dhe “Vepra të turpshme”.
Sakaq, policia sqaron se janë duke vijuar hetimet për verifikimin dhe dokumentimin e rasteve të tjera të kësaj veprimtarie kriminale, që mund të jenë kryer nga ky shtetas.
Lexo edhe: KAMERA E FSHEHTË/ “Piranjat” demaskojnë pedofilin tjetër, erdhi në Tiranë për 15-vjeçaren
Kujtojmë se 45-vjeçari ra në grackën e gazetares së “Piranjave”, pasi kjo e fundit u shtir si një 15-vjeçare. Ai u përpoq të përfitonte prej saj, pavarësisht se iu tha se ishte e mitur. Madje, ka udhëtuar disa herë nga Lezha duke i demonstruar asaj një karakter pervers dhe pse jo, të rrezikshëm.
Njoftimi i policisë:
Në lidhje me rastin e publikuar në emisionin “Piranjat”, në televizionin ABC Neës Albania, në të cilin është trajtuar rasti i një shtetasi që dyshohet se ka ngacmuar seksualisht nje shtetase 15 vjeçe dhe ka kryer veprime të turpshme ndaj saj, ju bëjmë me dije se:
Pas publikimit të këtij rasti, shërbimet policore të Drejtorisë Vendore të Policisë Lezhë kanë ndaluar, për veprat penale “Ngacmimi seksual” dhe “Vepra të turpshme”, shtetasin K. Gj., 45 vjeç, banues në fshatin Tale, person me precedent të mëparshëm penal në fushën e vjedhjes.
Vijojnë hetimet për verifikimin dhe dokumentimin e rasteve të tjera të kësaj veprimtarie kriminale, që mund të jenë kryer nga ky shtetas.
Materialet procedurale iu referuan Prokurorisë pranë Gjykatës së Rrethit Gjyqësor Lezhë, për veprime të mëtejshme.
Drejtoria Vendore e Policisë Lezhë falënderon mediat dhe qytetarët që denoncojnë raste të tilla dhe i fton sërish ata që të denoncojnë çdo rast paligjshmërie në numrin 112 apo në Komisariatin Dixhital, duke iu garantuar anonimat të plotë dhe reagim të menjëhershëm e të paanshëm.
/abcnews.al
