Loading ...
Një foto arrestimi nga Minesota është bërë virale në rrjetet sociale, pasi gruaja që shfaqet në të ka një ngjashmëri të habitshme me yllin e muzikës dhe kinemasë, Jennifer Lopez.
Bëhet fjalë për Cyrina Ann Quast, 35 vjeçe, e cila u arrestua më 30 gusht në Monticello, Minesota, nën akuzën për vjedhjen e dy pakove me bateri për vegla elektrike, me vlerë totale rreth 580 dollarë.
Sipas aktakuzës, një punonjës i dyqanit e njohu Quast si personin që dyshohet se ishte përfshirë në një vjedhje të ngjashme në të njëjtin biznes dy ditë më parë dhe njoftoi policinë. Autoritetet pretendojnë se 35-vjeçarja pranoi se kishte marrë bateritë, përpara se të arrestohej.
Megjithatë, ajo që tërhoqi më shumë vëmendjen e publikut nuk ishte akuza, por fotografia e saj pas arrestimit, e publikuar nga Zyra e Sherifit të Qarkut Wright. Përdoruesit e rrjeteve sociale vunë menjëherë në dukje ngjashmërinë e saj me Jennifer Lopez, 57 vjeç.
Komentet u shndërruan shpejt në batuta. Një përdorues shkroi se për një moment mendoi se ishte vetë J.Lo, ndërsa të tjerë iu referuan këngës së famshme “Jenny from the Block”.
“Jenny nga D-Block”, shkroi me humor një tjetër përdorues, duke iu referuar zhargonit amerikan dhe kuptimit të fjalës “block” në kontekstin e burgut.
Një tjetër komentues shkoi edhe më tej, duke sugjeruar me shaka që Jennifer Lopez dhe Quast të bënin një test ADN-je për të parë nëse janë motra.
Quast u lirua një ditë pas arrestimit. Sipas të dhënave publike të cituara në raportime, ajo ka pasur edhe më parë probleme me ligjin, përfshirë raste të lidhura me posedimin e drogës, drejtimin e mjetit nën ndikim, arratisjen nga policia dhe dhënien e një identiteti të rremë, si dhe shkelje të ndryshme të trafikut.
