Ministri për Europën dhe Punët e Jashtme, Ditmir Bushati, ishte i ftuar në emisionin “Provokacija” Abc News, ku foli rreth çështjes për hapjen e negociatave me BE-në.
I pyetur nga drejtuesi i emisionit, Mustafa Nano, nëse do të vinte bast me njeri për ratifikimin e rekomandimit të Komisionit Europian, Bushati u përgjigj se beson se vendet anëtare të BE-së do t’i japin mundësi Shqipërisë për të nisur bisedimet.
Megjithatë, Bushati shtoi se kjo nuk do të thotë domosdoshmërisht që bisedimet do të nisin direkt, duke marrë parasysh, sipas tij, praktikën që është ndjekur me Malin e Zi dhe Serbinë.
Mustafa Nano: “Ju mund të vini bast me dikë që vendimi do të ratifikohet”?
Ditmir Bushati: “Besojmë se vendet anëtare do t’i hapin një dritare Shqipërisë për të nisur bisedimet për anëtarësim, por kjo nuk do të thotë domosdoshmërisht që bisedimet do të nisin të nesërmen. Kam parasysh këtu praktikën që është ndjekur më Malin e Zi dhe Serbinë, ku nga momenti që u mor vendimi u desh një periudhë gjashtë muaj a diçka më shumë për të nisur bisedimet për anëtarësim. Besoj që vendet anëtare do të miratojnë logjikën e propozuar nga Komisioni Europian”.
/abcnews.al
