Miratohet projektligji për njohjen dhe konvertimin e patentave shqiptare në Itali

schedule18:01 - 19 Janar, 2022

schedule 18:01 - 19 Janar, 2022

Në mbledhjen e Këshillit të Ministrave ditën e sotme është miratuar projektligji për marrëveshjen e arritur mes Shqipërisë dhe Italisë për njohjen e ndërsjellë të lejeve të drejtimit me qëllim konvertimin e tyre.

Miratimi i këtij projektligji i hap rrugë njohjes së ndërsjellë të patentave në të dyja vendet dhe konvertimin e tyre nga qytetarët rezidentë në secilin prej shteteve.

NJOFTIMI

V E N D I M PËR MIRATIMIN E MARRËVESHJES NDRYSHUESE, ME SHKËMBIM NOTASH, TË MARRËVESHJES, NDËRMJET KËSHILLIT TË MINISTRAVE TË REPUBLIKËS SË SHQIPËRISË DHE QEVERISË SË REPUBLIKËS SË ITALISË, MBI NJOHJEN E NDËRSJELLË TË LEJEVE TË DREJTIMIT ME QËLLIM KONVERTIMI, MIRATUAR ME VENDIMIN NR.209, DATË 29.3.2021, TË KËSHILLIT TË MINISTRAVE

Në mbështetje të nenit 100 të Kushtetutës dhe të neneve 19 e 23, të ligjit nr.43/2016, “Për marrëveshjet ndërkombëtare në Republikën e Shqipërisë”, me propozimin e ministrit të Infrastrukturës dhe Energjisë, Këshilli i Ministrave

V E N D O S I:

Miratimin e marrëveshjes ndryshuese, me shkëmbim notash, të marrëveshjes, ndërmjet Këshillit të Ministrave të Republikës së Shqipërisë dhe qeverisë së Republikës së Italisë, mbi njohjen e ndërsjellë të lejeve të drejtimit me qëllim konvertimi, miratuar me vendimin nr.209, datë 29.3.2021, të Këshillit të Ministrave, që i bashkëlidhet këtij vendimi.

Ky vendim hyn në fuqi pas botimit në “Fletoren zyrtare”. /abcnews.al/