33 persona janë vënë nen prangat e policisë për importin e një sasi të madhe kokaine nga Hollanda në drejtim të Italisë. Pesë prej tyre janë arrestuar në Shqipëri me qëllim ekstradimin drejt vendit fqinj ndërsa gjashtë të tjerë janë shpallur në kërkim. Me këtë bilanc është mbyllur operacioni policior “Metropolis” një bashkëpunim mes autoriteteve shqiptare dhe atyre italiane. Detajet u bënë publike nga Drejtori i Përgjithshëm i Policisë se Shtetit Ardi Veliu.
“Njësia Hetimore Qëndrore në Departamentin e Policisë Kriminale në bashkëpunim me Drejtorinë e Forcës Operacionale në Policinë e Shtetit dhe me Drejtoritë Vendore të Policisë Tiranë, Durrës, Berat e Shkodër, në bashkëpunim dhe bashkërendim të veprimeve me Interforcën Italiane dhe Karabinierinë e Breshias Itali, kanë bërë të mundur kapjen dhe arrestimin provizor me qëllim ekstradimi drejt Italisë të shtetasve: G.S., 24 vjeç, lindur dhe banues në Tiranë, S. D., 43 vjeç, lindur në Gërmenj dhe banues në Tiranë, E.H., 39 vjeç, lindur dhe banues në Shijak/Durrës, A. M., 32 vjeç, lindur dhe banues në Shijak/Durrës, L. P. 35 vjeç, lindur dhe banues në Shkodër”.
Në këto masa përfshiheshin edhe personat e arrestuar nga operacionin në fjalë.
“Në përfundim të operacionit të përbashkët “METROPOLIS” me autoritetet policore italiane u arrestuan gjithsej 33 persona, nga këta 5 persona në Shqipëri, ndërsa 6 persona të cilët nuk janë kapur ende, janë shpallur në kërkim ndërkombëtar dhe po vijon puna për kapjen e tyre”.
Arrestimi i tyre është bërë për llogari të drejtësisë italiane, ndaj dhe pritet që të ekstradohen në fqinjin e përtej Adriatikut./abcnews.al
