Më shumë se 22 mijë aplikime, astronautët e ardhshëm “dynden” në Europë

schedule20:34 - 23 Qershor, 2021

schedule 20:34 - 23 Qershor, 2021

Më shumë se 22,000 njerëz, një e katërta e tyre gra, janë kandidatë për t’u bërë astronautët e ardhshëm europianë, pothuajse tre herë më shumë se në vitin 2008, njoftoi sot Agjencia Evropiane e Hapësirës (ESA).

Një total prej 22,589 njerëz nga 22 Shtete Anëtare dhe tre vende të lidhura me ESA kishin aplikuar kur mbaroi fushata e rekrutimit, e cila mbeti e hapur nga 31 Mars deri më 18 Qershor.

ESA kishte pranuar 8,413 aplikime në zgjedhjen e mëparshme, e cila ishte bërë 11 vjet më parë. Fushata 2021, e cila kërkon të krijojë një brez të ri, më të larmishëm të astronautëve, tërhoqi pothuajse tre herë më shumë kandidate dhe katër herë më shumë gra (5,419).

“Është mbresëlënëse dhe sigurisht historike,” tha Drejtori i Përgjithshëm i ESA Josef Asbacher, i cili e sheh këtë si një “simbol” të gatishmërisë së Europës për të eksploruar hapësirën, në Stacionin Hapësinor Ndërkombëtar dhe misionet e ardhshme në Hënë.

“Konkursi shpallet edhe më i ashpër për këto profesione të ëndërruara të kërkuara”, tha ai.

Vetëm katër deri në gjashtë kandidatë do të kapërcejnë vijën e finishit në fund të vitit 2022, pas një procesi të zgjatur gjashtë fazash. ESA gjithashtu do të punësojë, për herë të parë, rreth 20 persona për të krijuar një “trup rezervë”, si dhe një astronaut me aftësi të kufizuara fizike.

Franca renditet e para me 7,137 astronautë aspirantë, përfshirë 1,662 gra dhe 67 persona me aftësi të kufizuara. Ata ndiqen nga Gjermania (3,700 kandidatë), Mbretëria e Bashkuar (1,979), Italia (1,860) dhe Spanja (1,344).

ESA tani do të zgjedhë kandidatët të cilëve u kërkohet të jenë nën 50 vjeç, të kenë një diplomë master në shkencë ose inxhinieri dhe të paktën tre vjet përvojë profesionale.

Rreth 1,500 kandidatë do të kualifikohen në fazën tjetër, e cila përfshin teste psikologjike./abcnews.al