Situata e tensionuar mes PSG e Kylian Mbappe prej kohësh tashmë është në qendrën e vëmëndjes së mediave, me sulmuesin, që kërkon të largohet si lojtar i lirë, pas përfundimit të kontratës sezonin e ardhshëm, ndërsa klubi kërkon largimin e tij, që këtë merkato vere, në rast se ai nuk rinovon.
Pas refuzimeve të shumta të Mbappe, klubi ka vendosur mos ta tolerojë më sjelljen e tij fëmijënore dhe e ka “përjashtuar” nga skuadra, me këta të fundit që janë nisur drejt Japonisë ku do të zhvillojnë një tur miqësoresh, si para-përgatitje për sezonin e ardhshëm.
Ndërkohë, në Paris askush nuk mund ta kalojë lehtë këtë situate edhe njëri prej tyre është edhe kapiteni i “parisienëve”, Marquinhos, me brazilianin i cili ka shprehur dëshirën që ai të qëndrojë te PSG.
“Shpresoj që të gjendet një zgjidhje e mirë për të gjithë dhe Mbappe të qëndrojë në Paris. Ai është shumë i rëndësishëm për ne dhe e ka treguar në fushën e lojës. Ne duam që te PSG të jenë gjithmonë lojtarë të nivelit të tillë.
Cilësitë e tij nuk diskutohen, por kjo është një çështja delikate, një histori që kalon mbi ne, lojtarët dhe ka të bëjë me drejtuesit, presidentin dhe lojtarin në fjalë. Shpresoj që ata të gjejnë një zgjidhje të mirë që ai të jetë pjesë e grupit dhe të na ndihmojë këtë sezon”,- tha “lideri” i PSG. /i.m /abcnews.al
