“Lider, e dua në skuadër”, Mourinho “urdhër” Romës t’i sjellin një shqiptar

Roma do të drejtohet nga Jose Mourinho duke nisur prej sezonit të ardhshëm, lajm që ka krijuar entuziazëm të madh në qytetin e përjetshëm. Ulja e “Special One” në stol do të sjellë një merkato cilësorë këtë verë. Dëshira e parë e trajnerit të ri është një lojtar me origjinë shqiptare.

Sky Sports raporton se Mou i ka kërkuar drejtuesve t’i sjellin Granit Xhakën në skuadër. “Është lojtari më i rëndësishëm i mesfushës së Arsenalit. Ata janë të humbur pa të, Graniti është një lider i vërtetë“, shprehej trajneri portugez dy vite më parë.

 

Verdhekuqtë italianë kanë nisur negociatat me Arsenalin, që kërkon 25 milion euro për ta lënë të mirë 28-vjeçarin e kombëtares zvicerane. Roma shpreson të arrijë akordin për një shumë më të vogël dhe ofron deri në 15 milion euro.

Ndërkohë, drejtuesit e klubit kryeqytetas po bisedojnë edhe me agjentin e Xhakës. Nëse mesfushori pranon transferimin në Serie A, gjetja e marrëveshjes finale me “Topçinjtë” do të ishte më e thjeshtë, ndërsa Mourinho do siguronte një përforcim me vlera në mesin e fushës. /abcnews.al