Lëvizjet në krye të KQZ e Prokurorisë, Rama mbledh deputetët socialistë të ligjeve

Kryeministri Rama ka mbledhur sot për një mëngjes pune deputetët socialistë që janë anëtarë të Komisionit të Ligjeve. Takimi në fjalë, që nisi rreth orës 08:30, është zhvilluar në ambientet e Kryeministrisë dhe ka zgjatur për rreth një orë. Në kontekstin e aktualitetit politik, ky takim merr më shumë peshë, pasi ndodh vetëm pak ditë para se Parlamenti të nisë procedurat për dy vendime të rëndësishme. I pari është ai për shkarkimin e kreut të Komisionit Qendror të Zgjedhjeve, Klement Zguri. Ndërsa vendimi i dytë ka të bëjë me zgjedhjen e kryeprokurorit të ri të përkohshëm, që do të zëvëndesojë Adriatik Llallën, të cilit i mbaron mandati në fillim të dhjetorit. Të dyja këto proçedura duhet të nisin pikërisht nga Komisioni i Ligjeve, deputetët socialistë të të cilit Rama i mblodhi mëngjesin e sotëm në takim./abcnews.al