Përfundoi me shpalljen e fituesve spektakli “Virtuozët” i organizuar në TV Klan. Mes shumë emocioneve dhe magjisë që dhuruan 7 konkurrentët, të cilët mbërritën deri në finale, ky spektakel uli mbrëmë me sukses siparin e tij.
Në tre kategori, kanto, balet dhe instrument u shpall nga një fitues. Kështu në kategorinë kanto mes dy “Virtuozëve”, Arturit dhe Xhoidenit trofeu shkoi për këtë të fundit.
Ndërsa në kategorinë balet, Eskejda triumfoi në përballjen me Menajdën. Ishte balerina Andeta Toromani, ajo e cila dha çmimin për kategorinë balet.
Në instrument garuan Laura, Tedi dhe Klaudio. Fituese e kësaj kategorie u shpall e vetmja vajzë mes dy djemve, Luara Llozi.
E ftuar në këtë finale ishte dhe balerina Klaudia Pepa, e cila shkëlqeu si gjithmonë me performancat e saj.
Një tjetër i ftuar ishte dhe violinisti Piro Gjezi, i cili bën pjesë në plejadën e artë të solistëve dhe instrumentistëve shqiptarë. Profesori Gjezi dha çmimin në kategorinë instrument.
Më pas të tre konkurrentët që morën trofeun interpretuan për çmimin e madh. E ftuar për të shpallur fituesin ishte ministrja e Kulturës, Mirela Kumbaro. Çmimin e madh të spektaklit të vetëm të muzikës klasike në Shqipëri e fitoi Laura Llozi, e cila interpretoi në instrument./abcnews.al
