Lamine, Botërori në rrezik/ Superylli mund të ketë mbyllur sezonin për shkak dëmtimi

Siç shkruajnë gazetat në Katalonjë, suksesi kushtoi shtrenjtë.

Barcelona fitoi ndeshjen tepër të rëndësishme të La Ligës ndaj Seltës dhe rivendosi epërsinë prej 9 pikësh ndaj Realit ku mbeten edhe 6 javë deri në përfund, veçse kostoja ishte e lartë.

Ylli kryesor, talenti ndoshta më I madh I botës, Lamin Jamal, mbylli sfidën para kohe, që në 41’, por më e rëndësishmja duket se mbylli sezonin.

Sipas mediave spanjolle, edhe pjesëmarrja në Kupën e Botës është në rrezik, ndonëse shpresat janë që adoleshenti të kthehet.

Ai u dëmtua kur fitoi penalltinë që vendosi sfidën, dhe pasi e gjuajti vetë 11-metërshin.

Menjëherë pas kësaj, kërkoi zëvendësim dhe u largua nga fusha.

Priten analizat mjekësore për të përcaktuar kohën e mungesës, veçse këputjet muskulore duan kohë që të kalojnë.

“El Mundo Deportivo” shkruan se Barça pagoi shtrenjtë për të arritur një triumf kyç, Lamin Jamal u dëmtua dhe mund ta ketë mbyllur La Ligën! Fitore që kushtoi!

Ja edhe e përditshmja tjetër katalanase “Sport”: Alarmi Lamin! Një hap larg titullit! Ekipi azulgrana mban 9 pikë epërsi, por humb Lamin Jamalin!

Tashmë, në radhë vijnë duelet në kampionat ndaj Getafes dhe Osasunës, por sidomos “El Klasiko” I 10 majit në “Kamp Nou” ndaj Realit, dhe Lamin Jamal është thuajse 100 për qind e sigurt që nuk do të jetë.

Shpresohet që braziliani I rëndësishëm, Rafinja, të kthehet në kohë.

Kur janë në dispozicion edhe 18 pikë në La Ligë, Barcelona kryeson me 82 pikë ndaj 73 të Madridit.