Nga Erblina Mile
Ekonomia shqiptare ka përthithur më shumë kredi gjatë vitit 2021. Statistikat e Bankës së Shqipërisë tregojnë se në fund të vitit 2021 totali i kredisë arriti në vlerën 666.8 miliardë lekë niveli më i lartë i regjistruar gjatë 4 viteve të fundit. Peshën kryesore të rritjes së kredive në vend e mbajnë ndërmarrjet publike por edhe kredia për individë.
Segmenti i kredisë për individë ka kapur vlerat prej 235 miliardë lekësh por vlen të theksohet se gjatë vitit 2021 ka kredia e dhënë për qytetarët ka peshën më të lartë të regjistruar në kredinë totale të ekonomisë me rreth 35%.
Kjo situatë është ndikuar direkt prej kredive për blerje banesash. Bankat kanë favorizuar blerjen e pasurive të paluajtshme ndërkohë që ka pasur edhe një rritje të ndjeshme të apartamenteve sidomos në kryeqytet.
Nga të dhënat e Bankës së Shqipërisë konstatohet ndër të tjera se shuma e kredisë së re gjatë vitit 2021 arriti në 264.6 miliardë lekë dhe nëse e krahasojmë me vitin 2020 rezulton se ka pasur një rritje me rreth 8%.
Banka e Shqipërisë argumenton se në shtimin e kreditimit kanë ndikuar normat e interesit të kredisë për bizneset dhe individët që kanë mbetur në nivele të ulëta por edhe kursi i këmbimit të lekut ndaj valutave kryesore ka qenë i qëndrueshëm.
Kredia bankare i ka shërbyer financimit të konsumit e të investimeve dhe mbulimit të nevojave për likuiditet, si të bizneseve dhe të familjeve. Ndërkohë që kredia në lekë ka mbajtur ritme relativisht të larta rritjeje, duke pasqyruar efektivitetin e politikës monetare duke zbutur rreziqet e kursit të këmbimit në stabilitetin financiar. /abcnews.al/
