Konfirmohen 158 raste të reja me koronavirus në vend, humbin jetën tre persona, 140 të shëruar

Vijon të jetë i lartë numri i rasteve të reja me koronavirus në vend. Ministria e Shëndetësisë njoftoi sot 158 raste pozitive nga 905 testime të kryera për të dyshuar.

Numri i rasteve të reja sot është më i lartë se një ditë më parë, ku u konfirmuan 144 raste pozitivë.

Sipas ministrisë, rastet pozitive të konfirmuara në 24 orët e fundit janë identifikuar në këto bashki: 98 të prekur në Tiranë, 8 raste në Fier dhe Elbasan, 6 raste në Durrës dhe Berat, 5 raste në Tropojë, 4 raste në Shkodër, 3 raste në Ura Vajgurore dhe Kuçovë, 2 raste në Krujë, Kurbin, Kavajë, Sarandë, Shijak, Skrapar, 1 rast në Korçë, Lezhë, Rrogozhinë, Gjirokastër, Malësi e Madhe.

Aktualisht në spitalin Infektiv dhe “Shefqet Ndroqi” po trajtohen 214 pacientë, 15 në terapi intensive nga të cilët 3 pacientë janë të intubuar.

Ndërkaq, fatkeqësisht në 24 orët e fundit edhe tre qytetarë nuk kanë arritur të fitojnë betejën me virusin e rrezikshëm, duke e çuar në 403 numrin e viktimave që nga shpërthimi i pandemisë në vend.

Në 24 orët e fundit në Shqipëri janë shëruar 140 qytetarë nga koronavirusi. Numri është ulur në krahasim me ditën e djeshme, ku ishin 10 qytetarë me shumë që fituan betejën me Covid-19.

“Ministria e Shëndetësisë dhe Mbrojtjes Sociale iu drejtua edhe sot me një apel qytetarëve që të jenë të kujdesshëm në zbatimin e rregullave të higjienës, distancimit fizik dhe vendosjen e maskës mbrojtëse.

Kontaktoni me mjekun e familjes ose telefononi Urgjencën Kombëtare në numrin 127 nëse dyshoni se ju apo një i afërmi juaj është i prekur nga Covid19. Telefononi në linjën e gjelbër falas 0800 40 40 për të kontaktuar mjekun e familjes, për sherbim psikologjik te specializuar dhe të sigurt si dhe për çdo informacion tjetër rreth Covid19″, thuhet në apelin e MSH.