Erblina Mile
Avokatura e shtetit nuk ka kryer detyrën në mbrojtjen e Shqipërisë në çështje të arbitrazhit ndërkombëtar ku rrezikon të paguajë fatura të majme. Ky ka qenë rezultati i auditimit të realizuar së fundmi nga Kontrolli i Lartë i Shtetit në këtë institucion.
Shqipëria rrezikon gjoba të kripura që sipas KLSH arrijnë në total në 388.5 milionë euro vetëm nga 5 vendime që tashmë janë përfundimtare. Në raport, Kontrolli i lartë i shtetit thekson se gjatë auditimit në avokaturën e shtetit janë gjetur një sërë mangësish.
KLSH thekson se në përfundim të proceseve gjyqësore në gjykatat e huaja të cilët kanë rezultuar me penalitete të rënda financiare për Shtetin Shqiptar, nga ana e Avokaturës së Shtetit mungojnë analizat dhe vlerësimet mbi veprimet dhe mosveprimet e administratës publike, shkaqet dhe masat që duhet të merren ndaj shkaktarëve.
Në asnjë rast thuhet në raport avoktura e shtetit nuk rezulton se ka bërë sugjerime apo propozime për Këshillin e Ministrave mbi hapat e nevojshëm që duhet të merren për evitimin e veprimeve të padrejta ose abuzive në të ardhmen nga funksionarët publikë.
Problematika janë hasur edhe në rastet kur Shqipëria ka realizuar fituese në arbitrazh. Sipas auditimit të KLSH mungojnë veprimet e nevojshme administrative e ligjore për rikuperimin e vlerave financiare në rastet e vendimeve në favor të Shqipërisë.
KLSH ka vërejtur ndër të tjera parregullsi administrative dhe në procedurat e kontraktimit të studiove të huaja ligjore duke prodhuar kosto shtesë të paparashikuara në buxhet
Problematika nga auditimi në këtë institucion është vërejtur edhe në arkivimin e dokumentacionit ku thuajse përgjatë gjithë proceseve të audituara si, praktika kontraktimi, prokurimi apo inspektimi, mungojnë dokumente. /abcnews.al/
