Izraeli: Zgjidhja me dy shtete do të çonte në krijimin e një shteti terrorist palestinez

Izraeli ka hedhur poshtë zgjidhjen e konfliktit me dy shtete, ndërsa një samit i OKB-së, ku marrin pjesë dhjetëra vende, diskuton këtë temë në Nju Jork.

Duke folur në një konferencë për shtyp, ministri i jashtëm Gideon Sa’ar dukej se e kishte vënë në shënjestër drejtpërdrejt samitin.

Ai pretendoi se kishte një “fushatë të shtrembëruar presioni ndërkombëtar kundër Izraelit” dhe e përshkroi zgjidhjen me dy shtete si një “shtet terrorist palestinez”.

“Themelimi i një shteti palestinez sot është themelimi i një shteti të Hamasit”, shtoi Sa’ar.

Izraeli nuk ka ndjekur një zgjidhje me dy shtete vitet e fundit dhe pozicioni i tyre është ashpërsuar që nga sulmet e 7 tetorit nga Hamasi.