Për herë të parë pas dekadash, shoferi personal i Dianës ka folur për princeshën e ndjerë. Ai ka zbuluar momente të panjohura më parë nga jeta e saj dhe rrëfen se do të kishte jetuar nëse ai do të kishte qenë në timon atë natë fatale në Paris.
Steve Davis ka punuar për Princeshën Diana dhe ka qenë shumë i afërt me të deri në vitin 1995. Siç thotë ai, befas brenda një nate princesha “ngriti një mur” mes tyre dhe nuk donte që ai të ishte pranë saj. Si pasojë, e lanë makinën në garazh.
Por çfarë ndodhi vërtetë me Steve Davies?
Gazetari i BBC-së Martin Bashir e kishte implikuar atë në një skemë për të intervistuar princeshën. Bashir i kishte pohuar Princeshës Diana se shteti britanik po e mbikqyrte dhe shoferi i saj po nxirrte informacione për të në shtyp dhe ishte pjesë e komplotit.
Shoferi nuk e mori vesh kurrë se çfarë ndodhi dhe u gjet jashtë Pallatit. Princesha Diana vendosi ta pushonte nga puna. Mbreti Charles, i cili atëherë ishte trashëgimtar i fronit, e thirri dhe i tha se nuk kishte më vend për të punuar në shtëpinë e tij.
Rasti i tij, megjithatë, u përmend në një episod të serialit “The Crown”. Gruaja dhe vajza e Steve Davis e panë dhe përfundimisht i shpjeguan atij pse u pushua nga puna.
“Të punoja për të ishte një gëzim, një gëzim absolut. Unë e doja atë, si gjithë të tjerët. Unë kisha një respekt të jashtëzakonshëm për të dhe do të bëja gjithçka për të. Nuk mund ta shpreh me fjalë pikëllimin tim kur u vra. E vetmja gjë që di është se nëse jeta do të kishte marrë një rrjedhë tjetër, nëse do të kisha vozitur atë natë në Paris, ajo do të ishte ende këtu sot, sepse unë do ta kisha mbajtur të sigurt”, tha Steve Davis.
Dy herë tani ai ka vizituar tunelin në Paris ku u vra Princesha Diana për t’u ndeshur me atë që ndodhi. “Bashir i tha Dianës se njerëzit si unë ishin spiunë dhe shitës. Ai në thelb i tha asaj se unë isha një tradhtar, ndërsa tradhtia ishte e tij”, u shpreh Steve Davis.
Siç rrëfeu ai, ai ishte pranë saj kur ajo po finalizonte divorcin nga Mbreti Charles dhe pa nga afër vështirësitë që ajo kishte. Ai madje përshkroi një incident të panjohur me Elton John.
“Një natë, teksa priste Princeshën Diana në kuzhinën e rezidencës së Elton John në Windsor dhe po hante, Elton John u prezantua dhe i kërkoi të hynte në dhomën e ndenjes për të parë mini-koncertin që do të jepte për princeshën dhe George Michael. “Eltoni u hodh në kuzhinë dhe tha: “Steve, a po kujdesesh për të?” dhe pastaj më tha të kaloja. Shikova Dianën dhe pyeta në heshtje: “Çfarë – edhe unë?”. Ajo buzëqeshi dhe tha: “Po! Natyrisht!”. Pra, ja ku ishim, Diana dhe unë, Eltoni dhe George, duke u larguar nga bota ime dhe në të sajën”, rrëfeu Steve Davis.
Ai vazhdoi: “Një herë tjetër ajo insistoi që të dilja nga makina për të takuar Nënë Terezën që po vizitonte fshehurazi Londrën. Me Dianën, nuk e dinim kurrë se çfarë do të sillte e ardhmja”./abcnews.al
