Franca ka lëshuar një mesazh të ashpër për Turqinë pas zhvillimeve të fundit në juglindje të ishullit grek të Kastellorizo. Vendi i bëri thirrje qeverisë turke të respektojë në praktikë vendimet e BE dhe të tregojë gatishmërinë e saj për të filluar një dialog me Athinën.
Gjatë konferencës së përditshme për shtyp, përfaqësuesja e Ministrisë së Evropës dhe Punëve të Jashtme, Agnès Von der Mühll, i bëri thirrje Turqisë të përmbahet “nga çdo veprim i mëtejshëm provokues.”
E pyetur në lidhje me reagimin e Francës ndaj njoftimit të Ankarasë për kthimin e një anijeje kërkimore turke në Mesdheun lindor, në ujërat territoriale të pretenduara nga Greqia, zëdhënësja e ministrisë tha:
“Ne shprehim shqetësimin tonë në lidhje me njoftimin turk për një ekspeditë të re të anijes sizmografike Oruç Reis pranë Kastellorizo dhe Rhodes. Në Këshillin Evropian, në 1 Tetor, ne i bëmë një thirrje të qartë Turqisë që të përmbahet nga ndërmarrja e veprimeve të njëanshme kundër interesave të Bashkimit Evropian dhe shkelja e ligjit ndërkombëtar dhe të drejtave sovrane të Shteteve Anëtare të Bashkimit. Ne presim që Turqia të respektojë angazhimet e saj, të shmangë provokimet e reja dhe të tregojë gatishmërinë e saj për dialog në mirëbesim “. s.b/abcnews.al/
