Njëri nga të mbijetuarit e aksidentit tragjik të 23 nëntorit në Bullgari ka folur për mediat në Maqedoninë e Veriut. Orhan Aliti arriti të mbijetonte në aksidentin që mori 45 jetë njerëzish mes të cilave ishte edhe i biri Visari.
Alsat ka publikuar një pjesë të intervistës së dhënë gazetarit Adrian Kerimi. Në pjesën e shkëputur Aliti flet për të birin dhe shpresat që kishte deri në momentin e fundit.
Ndërkohë, sipas raportimeve, trupat mbërrijnë në Shkup të martën, më 30 nëntor. Deri më atëherë pritet të përfundojë procedura e identifikimit nëpërmjet analizës së ADN-së. Po ashtu, sot në kryeqytetin e Maqedonisë së Veriut ndodhen prokurorët bullgarë të cilët kanë ardhur për të tërhequr materialin biologjik të marrë nga familjarët, me qëllim të identifikimit të viktimave.
Autobusi i djegur i “Besa Trans” rezultoi se nuk ishte i pajisur me licencë ndërsa dy vitet e fundit ka dalë nga shteti 135 herë duke kryer transporte me udhëtarë. Ndërsa Ministria e Transportit sqaron se autobusi e ka kaluar kufirin me licencë të një autobusi tjetër.
